जीवन बीमा कम्पनीको आम्दानीमा पुराना बीमालेखको भर, नयाँ व्यवसायको हिस्सा एक चौथाइ मात्रै

काठमाण्डौ । जीवन बीमा क्षेत्रमा हाल नवीकरण बीमाशुल्कको हिस्सा ७५ प्रतिशत छm भने प्रथम बीमाशुल्कको हिस्सा २५ प्रतिशत रहेको छ ।  

नेपाल बीमा प्राधिकरणको तथ्याङ्कअनुसार जीवन बीमा कम्पनीहरुको आम्दानी मुख्यतः पुराना बीमालेखको नवीकरणमा आधारित रहेको देखिएको छ । यसले एकातर्फ बीमितले बीमा निरन्तरता दिइरहेको सकारात्मक संकेत गरेपनि अर्कोतर्फ नयाँ व्यवसाय विस्तार अपेक्षाकृत कमजोर रहेको संकेत गरेको छ ।  

प्राधिकरणका अनुसार जीवन बीमकहरुले गत आर्थिक वर्ष २०८२÷८३ मा २ खर्ब एक करोड ९१ लाख रुपैयाँ कुल बीमाशुल्क आर्जन गरेका छन् । जसमा नवीकरणमार्फत १ खर्ब ५० अर्ब ६१ करोड रुपैयाँ प्रिमियम संकलन भएको छ भने नयाँ व्यवसाय अर्थात् प्रथम बीमाशुल्क ४९ अर्ब ४० करोड रुपैयाँ संकलन भएको छ ।  

यस हिसाबमा जीवन बीमा कम्पनीहरुको व्यवसायको अधिकांश हिस्सा नवीकरण बीमाशुल्कले धानेको देखिन्छ । बीमकहरुको नयाँ व्यवसाय वृद्धि सुस्त हुँदा दीर्घकालीन बजार विस्तार, बीमाको पहुँच तथा कम्पनीहरूको भविष्यको वृद्धिमा असर पर्न सक्ने देखिन्छ । त्यसैले नयाँ ग्राहक आकर्षित गर्ने रणनीति, ग्राहकको आवश्यकताअनुसार नवीन बीमा योजना, डिजिटल सेवा विस्तार तथा वित्तीय साक्षरता अभिवृद्धिमा विशेष जोड दिनुपर्ने आवश्यकता देखिएको छ ।  

बीमा विज्ञहरुले एजेन्टहरूको क्षमता विकास, बैंकास्योरेन्समार्फत बजार विस्तार, ग्रामीण क्षेत्रमा बीमा पहुँच वृद्धि तथा छिटो, पारदर्शी र गुणस्तरीय सेवा प्रदान गर्न सके प्रथम बीमाशुल्कको हिस्सा बढाउन सहयोग पुग्ने बताएका छन् ।

बीमा कम्पनीहरूले नवीकरण बीमाशुल्कबाट प्राप्त स्थिर आम्दानीलाई कायम राख्दै नयाँ व्यवसाय विस्तारमा ध्यान केन्द्रित गर्न सके जीवन बीमा क्षेत्र थप प्रतिस्पर्धी, दिगो र समावेशी बन्ने अपेक्षा गरिएको छ ।

अघिल्लो आर्थिक वर्ष २०८१÷८२ को तुलनामा बीमकहरुको नयाँ व्यवसाय र नवीकरणमार्फत हुने व्यवसाय दुबै वृद्धि देखिएको छ । प्राधिकरणका अनुसार नयाँ व्यवसाय २३ प्रतिशतले बढेको छ भने नवीकरणमार्फत हुने व्यवसाय ९.३६ प्रतिशतले वृद्धि भएको छ ।  

तर अघिल्लो आवको तुलनामा गत आवमा नयाँ व्यवसाय बढेपनि नवीकरण र नयाँ व्यवसायको अनुपात भने धेरै देखिएको छ । नवीकरण बीमाशुल्कको उच्च हिस्साले विद्यमान बीमितहरूले आफ्नो बीमालेख निरन्तर कायम राखिरहेको संकेत गरेपनि प्रथम बीमाशुल्कको हिस्सा २५ प्रतिशतमा सीमित रहनुले नयाँ ग्राहक आकर्षित गर्ने कार्यमा अझै सुधारको आवश्यकता रहेको देखिन्छ ।  

विज्ञहरुका अनुसार जीवन बीमकहरुको नयाँ व्यवसाय विस्तार नभए वा कुल व्यवसायमा नयाँ व्यवसायको हिस्सा वृद्धि नभए भविष्यमा बजार वृद्धि र बीमा पहुँच विस्तारमा चुनौती आउन सक्ने देखिन्छ ।