एकैदिन ५८ डलरले बढेर दुई महिनायताकै उच्च विन्दुमा पुग्यो सुनको भाउ

काठमाण्डौ । अन्तर्राष्ट्रिय बजारमा सुनको मूल्य लगातार तेस्रो कारोबार दिन बढ्दै दुई महिनायताकै उच्च विन्दुमा पुगेको छ। अमेरिकी मुद्रास्फीतिसम्बन्धी तथ्यांक सार्वजनिक हुनुअघि लगानीकर्ताले अमेरिकी ब्याजदरको आगामी दिशाबारे संकेत खोजिरहेका बेला सुनको मूल्यमा वृद्धि भएको हो।

मंगलबारको कारोबारमा सुनको मूल्य १.३१ प्रतिशत अर्थात ५८ डलरले बढेर प्रतिऔंस ४ हजार ४१९ डलर पुगेको छ । यो मूल्य गत जुन ५ यताकै उच्च मूल्य हो।

अमेरिकामा बुधबार सार्वजनिक हुने उपभोक्ता मूल्यसम्बन्धी तथ्यांक तथा बिहीबार सार्वजनिक हुने उत्पादक मूल्यसम्बन्धी तथ्यांकले आगामी मौद्रिक नीतिबारे बजारको अपेक्षालाई प्रभावित गर्ने अनुमान गरिएको छ।

गत साता सार्वजनिक कमजोर अमेरिकी रोजगारी तथ्यांकपछि अमेरिकी फेडरल रिजर्भले आगामी महिना ब्याजदर बढाउने सम्भावनाबारे बजारको अनुमान केही कमजोर भएको थियो।

फेडरल रिजर्भले गत जुलाईको बैठकमा ब्याजदर यथावत् राखेको थियो। उक्त निर्णयमा तीन जना अधिकारीले ब्याजदर वृद्धि गर्नुपर्ने पक्षमा असहमति जनाएका थिए।

सामान्यतया ब्याजदर घट्दा ब्याज नदिने सम्पत्ति सुनप्रति लगानीकर्ताको आकर्षण बढ्ने गर्छ। अर्थतन्त्र सुस्त हुँदै गएको तर मुद्रास्फीतिमा उल्लेखनीय वृद्धि नदेखिएको अवस्थामा मौद्रिक नीति थप कडा बनाउने अपेक्षा कमजोर हुन सक्ने र त्यसले अमेरिकी डलरलाई दबाबमा पार्दै सुनको मूल्यलाई थप समर्थन गर्ने गर्छ ।

अमेरिका र इरानबीचको तनाव तथा स्ट्रेट अफ हर्मुजमा उत्पन्न परिस्थितिले पनि सुरक्षित लगानीका रूपमा सुनको माग बढाउन सक्ने देखिएको छ। अमेरिकी राष्ट्रपति डोनाल्ड ट्रम्पले इरानले शान्ति सम्झौताका लागि राखेका सर्तको जवाफमा युद्ध, आक्रमण तथा प्रदर्शनमा मारिएका व्यक्तिका लागि क्षतिपूर्ति दिनुपर्ने लगायतका आफ्ना माग अघि सारेका छन्। यसले दुई देशबीचको कूटनीतिक प्रयास थप जटिल बन्न सक्ने देखिएको छ।

यसैबीच चाँदीको भाउपनि १.१६ प्रतिशतले बढेर प्रतिऔंस ६५ डलर कायम भएको छ ।