टाटाले ल्यायो नयाँ पञ्च र टियागो ईभी, ठूलो ब्याट्री र अत्याधुनिक प्रविधि विशेषता

काठमाण्डौ । सिप्रदी ट्रेडिङले टाटाका दुई नयाँ विद्युतीय मोडल ‘पञ्च ईभी फेसलिफ्ट’ र ‘टियागो ईभी फेसलिफ्ट’ सार्वजनिक गरेको छ । दुवै मोडल सिप्रदी ट्रेडिङका प्रमुख कार्यकारी अधिकृत राजनबाबु श्रेष्ठले आजबाट सुरु भएको ‘नाइमा मोबिलिटी एक्स्पो २०२६’मा सार्वजनिक गरेका हुन् ।

दुई नयाँ गाडी सार्वजनिक भएसँगै नेपाली बजारमा टाटाका विद्युतीय सवारीसाधनका विकल्प थपिएका छन् । कम्पनीले टियागो ईभी फेसलिफ्टको मूल्य २८ लाख ९९ हजार रुपैयाँ र पञ्च ईभी फेसलिफ्टको मूल्य ३२ लाख ९९ हजार रुपैयाँ तोकेको छ ।

कम्पनीका अनुसार नयाँ पञ्च ईभीमा अघिल्लो मोडलको तुलनामा ठूलो ब्याट्री, बढी रेञ्ज, छिटो चार्जिङ सुविधा, अत्याधुनिक प्रविधि तथा थप प्रिमियम ड्राइभिङ अनुभव समावेश गरिएको छ । यसलाई थप शक्तिशाली र सुविधासम्पन्न विद्युतीय एसयूभीका रूपमा बजारमा ल्याइएको हो ।

ईभीको बिक्री विस्तारसँगै आवश्यक पूर्वाधार निर्माणमा पनि सिप्रदी ट्रेडिङले जोड दिँदै आएको जनाएको छ । सिप्रदी ट्रेडिङका चिफ अपरेटिङ अफिसर राजेशप्रसाद गिरीले ईभी बिक्रीसँगै सम्बद्ध सेवाको सञ्जालसमेत विस्तार भइरहेको बताए । उनका अनुसार हाल सिप्रदीको २१ भन्दा बढी ईभी सर्भिस सेन्टर, ३९ वटा डीसी चार्जिङ प्वाइन्ट र १५० भन्दा बढी एसी चार्जिङ प्वाइन्ट सञ्चालनमा छन् ।

सिप्रदी ट्रेडिङका प्रमुख कार्यकारी अधिकृत राजनबाबु श्रेष्ठले पछिल्लो प्रविधिसहितका विद्युतीय सवारीसाधन भित्राउने कम्पनीको प्रतिबद्धताअनुसार नयाँ पञ्च ईभी र टियागो ईभी सार्वजनिक गरिएको बताए ।

नयाँ पञ्च ईभीमा दुई ब्याट्री विकल्प

नयाँ पञ्च ईभीमा ३२ किलोवाट घण्टा र ४० किलोवाट घण्टा क्षमताका दुई ब्याट्री विकल्प उपलब्ध छन् । नेपालमा गरिएको सडक परीक्षणका आधारमा यी ब्याट्रीले एकपटकको चार्जमा ३०० देखि ३२५ किलोमिटरसम्म रेञ्ज दिने कम्पनीले जनाएको छ । ग्राहकले आफ्नो आवश्यकता र बजेटअनुसार ब्याट्री विकल्प छनोट गर्न सक्नेछन् ।

अत्याधुनिक ‘एक्टिभ’ प्रविधिमा आधारित पञ्च ईभीमा नयाँ पुस्ताका विभिन्न प्रविधि तथा सुविधा समावेश गरिएको छ । गाडीमा उच्च क्षमताको ब्याट्रीसँगै फाइभ स्टार सुरक्षा रेटिङ, आवाजबाट सञ्चालन गर्न सकिने विद्युतीय सनरुफ, हर्मनको २६.०३ सेन्टिमिटरको सूचना तथा मनोरञ्जन प्रणाली, ३६० डिग्री क्यामरा, ३६६ लिटरको बुट स्पेस र ६ वटा एयरब्याग उपलब्ध छन् ।

त्यस्तै, पञ्च ईभीमा १९५ मिलिमिटरको ग्राउन्ड क्लियरेन्स पनि रहेको छ । यससँगै थप सुरक्षा सुविधा समावेश गरिएकाले सहज र सुरक्षित ड्राइभिङ अनुभव प्रदान गर्ने कम्पनीको दाबी छ ।

त्यस्तै, गाडीमा १.५ सीडीसी फास्ट चार्जिङ, हावा प्रवाह हुने छालाजस्तो सिट, नेभिगेसनसहितको २६.०३ सेन्टिमिटर डिजिटल ककपिट तथा ६० भन्दा बढी सुरक्षा सुविधा उपलब्ध छन् ।

नयाँ पञ्च ईभी विभिन्न आकर्षक रङमा समेत उपलब्ध हुनेछ । कम्पनीका अनुसार यो गाडी बेङ्गाल रोज (रातो), फियरलेस यल्लो, एम्पावर्ड अक्साइड, प्योर ग्रे र प्रिस्टिन हाइट रङमा उपलब्ध छ ।

दैनिक आवतजावतका लागि ‘टियागो ईभी’

टाटाको अर्को विद्युतीय गाडी ‘टियागो ईभीलाई दैनिक आवतजावतका लागि उपयोगी विद्युतीय ह्याचब्याकका रूपमा बजारमा ल्याइएको हो । यसमा अघिल्लो मोडलको तुलनामा थप सुविधा तथा प्रविधि समावेश गरिएको कम्पनीले जनाएको छ ।

व्यवहारिक, सहज र प्रविधिमैत्री विद्युतीय सवारीसाधन खोज्ने ग्राहकलाई लक्षित गरी टियागो ईभीको फेसलिफ्ट ल्याइएको कम्पनीको भनाइ छ ।