इन्फिनिटी लघुवित्तको नाफामा २८०% को उछाल, ईपीएस बढ्दा खराब कर्जा अनुपातमा उल्लेख्य गिरावट

Capital Market
आईतवार, बैशाख २३,२०८१ 13:47:16

काठमाण्डौ । इन्फिनिटी लघुवित्त वित्तीय संस्था लिमिटेडको खुद नाफामा २८०.५६ प्रतिशतको उछाल आएको छ । संस्थाले चालु आवको तेस्रो त्रैमाससम्ममा ५ करोड २५ लाख रुपैयाँ खुद नाफा आर्जन गरेको छ । अघिल्लो आवको सोहि अवधिसम्म भने संस्थाले १ करोड ३८ लाख रुपैयाँ मात्रै खुद नाफा कमाएको थियो ।

यो अवधिसम्म संस्थाको खुद ब्याज आम्दानी समेत वृद्धि भएको छ । तेस्रो त्रैमाससम्म संस्थाले १९ करोड ९३ लाख रुपैयाँ खुद ब्याज आम्दानी गरेको छ । जुन अघिल्लो आवको सोहि अवधिको तुलनामा ३.२५ प्रतिशतले धेरै हो ।

संस्थाको खुद सञ्चालन आम्दानी २९.३२ प्रतिशतले बढेर २७ करोड २८ लाख रुपैयाँ पुगेको छ । संस्थाले कर्मचारीका लागि १३ करोड ५५ लाख र अन्य सञ्चालनका लागि ४ करोड ८५ लाख रुपैयाँ खर्च गरेको छ ।

संस्थाको रिटेन्ड अर्निङ ४ करोड ४६ लाख रुपैयाँ ऋणात्मक, र रिजर्भको आकार २६ करोड ५७ लाख रुपैयाँ रहेको छ । अघिल्लो आवको तेस्रो त्रैमाससम्म भने संस्थाको रिजर्भको आकार १६ करोड ७९ लाख रुपैयाँमा सीमित थियो । संस्थाको चुक्तापूँजी ४९ करोड ७४ लाख रुपैयाँ रहेको छ ।

तेस्रो त्रैमाससम्म संस्थाको निक्षेप संकलन घटेको छ भने कर्जा प्रवाह भने वृद्धि भएको छ । अघिल्लो आवको तेस्रो त्रैमाससम्म १ अर्ब ३१ करोड रुपैयाँ रहेको निक्षेप संकलन घटेर १ अर्ब २७ करोड रुपैयाँ पुगेको छ ।

त्यस्तै कर्जा प्रवाह भने ४ अर्ब ३९ करोड रुपैयाँबाट बढेर ५ अर्ब १५ करोड रुपैयाँ पुगेको छ । संस्थाको वितरणयोग्य मुनाफा ४ करोड ४६ लाख रुपैयाँले ऋणात्मक अवस्थामा छ ।

इम्पेयरमेन्ट चार्जका लागि १ करोड ५५ लाख रुपैयाँले ऋणात्मक रहेको संस्थाको खराब कर्जा अनुपात भने उल्लेख्य घटेको छ । संस्थाको खराब कर्जा अनुपात १४.०४ प्रतिशतबाट घटेर ४.९७ प्रतिशत झरेको छ ।

समीक्षा अवधिसम्म संस्थाको प्रतिसेयर आम्दानी(ईपीएस) पनि ह्वात्तै बढेको छ । अघिल्लो आवको तेस्रो त्रैमाससम्म ३.७० प्रतिशतमा सीमित रहेको ईपीएस बढेर १४.१० रुपैयाँ कायम भएको छ ।

यस्तै संस्थाको प्रतिसेयर नेटवर्थ १४४.४५ रुपैयाँ,प्रतिसेयर कुल सम्पत्तिको मूल्य १ हजार १२०.६९ रुपैयाँ,मूल्य आम्दानी अनुपात ५८.५४ गुणा र तरलता अनुपात ७.२२ प्रतिशत कायम भएको छ ।