अमेरिकी ब्याजदरबारे आशंका घटेसँगै सुनको मूल्य लगातार तेस्रो दिन बढ्यो, प्रतिऔंस कति ?

काठमाण्डौ । अमेरिकी केन्द्रीय बैंक फेडरल रिजर्भले आगामी महिना ब्याजदर बढाउने सम्भावना कम हुँदै गएपछि अन्तर्राष्ट्रिय बजारमा सुनको मूल्य मंगलबार लगातार तेस्रो दिन बढेको छ। लगानीकर्ताको ध्यान भने फेडरल रिजर्भको पछिल्लो बैठकको विवरणतर्फ केन्द्रित छ, जसबाट आगामी मौद्रिक नीतिको दिशाबारे थप संकेत प्राप्त हुने अपेक्षा गरिएको छ।

यो समाचार तयार पार्दासम्म स्पट गोल्डको मूल्य ०.४२ प्रतिशत अर्थात १८ डलरले बढेर प्रतिऔंस ४ हजार ३९५ अमेरिकी डलर पुगेको छ। अमेरिकी डलर प्रमुख मुद्राको तुलनामा पछिल्ला केही महिनायताकै न्यून स्तर आसपास रहेको छ। डलर कमजोर हुँदा अन्य मुद्रामा कारोबार गर्ने लगानीकर्ताका लागि डलरमा मूल्य निर्धारण हुने सुन तुलनात्मक रूपमा सस्तो पर्न जान्छ, जसले सुनको माग बढाउन सहयोग गर्छ।

Sponsored

Sponsored

पछिल्लो समय सार्वजनिक भएका कमजोर अमेरिकी आर्थिक तथ्यांकले फेडले यस वर्ष ब्याजदर यथावत् राख्ने सम्भावना बढाएको छ। गत साता रोजगारीसम्बन्धी कमजोर तथ्यांक, अपेक्षाभन्दा कम उपभोक्ता मूल्यवृद्धि तथा कमजोर खुद्रा बिक्रीले पनि ब्याजदर वृद्धिको सम्भावना घटाएको हो।

ब्याजदर न्यून वा स्थिर रहने वातावरणमा सुनजस्ता प्रतिफल नदिने सम्पत्तिको आकर्षण बढ्ने गर्छ।

अब लगानीकर्ताको मुख्य ध्यान बुधबार सार्वजनिक हुने फेडरल रिजर्भको पछिल्लो मौद्रिक नीति बैठकको विवरणमा रहेको छ। उक्त विवरणबाट अमेरिकी केन्द्रीय बैंकका अधिकारीहरूको ब्याजदर तथा मुद्रास्फीतिप्रतिको दृष्टिकोणबारे थप स्पष्टता आउने अपेक्षा गरिएको छ।