.gif)
.png)
काठमाण्डौ । उत्तर कोरियाले बिहीबार पूर्वी समुद्र (सी अफ जापान) तर्फ करिब १० वटा छोटो दूरीका ब्यालिस्टिक क्षेप्यास्त्र प्रहार गरेको दक्षिण कोरियाली सेनाले जनाएको छ। दक्षिण कोरियाको संयुक्त सेनाध्यक्ष समितिका अनुसार क्षेप्यास्त्रहरू स्थानीय समयअनुसार साँझ करिब ५ बजे प्योङयाङ क्षेत्रबाट प्रहार गरिएका थिए।
दक्षिण कोरियाली सेनाका अनुसार क्षेप्यास्त्रहरू करिब ३०० किलोमिटर उडेका थिए। प्रक्षेपणको विस्तृत प्राविधिक विवरणबारे दक्षिण कोरिया र अमेरिकाले संयुक्त रूपमा विश्लेषण गरिरहेका छन्। दक्षिण कोरिया, अमेरिका र जापानले घटनासम्बन्धी सूचनासमेत आदानप्रदान गरेका छन्।
यो प्रक्षेपण अगस्ट १७ देखि सुरु भएको अमेरिका–दक्षिण कोरिया संयुक्त सैन्य अभ्यास ‘उल्ची फ्रिडम शिल्ड’ का बीचमा भएको हो। अमेरिकी राष्ट्रपति डोनाल्ड ट्रम्पको निर्देशनपछि उक्त सैन्य अभ्यासको अवधि ११ दिनबाट घटाएर पाँच दिनमा सीमित गर्ने र केही मैदानी अभ्यास कटौती गर्ने निर्णय गरिएको थियो। अभ्यास अब अगस्ट २१ मै सकिनेछ।
तर, उत्तर कोरियाली नेता किम जोङ उनकी बहिनी किम यो जोङले सैन्य अभ्यासको अवधि वा आकार घटाउँदैमा त्यसको ‘उत्तेजक र आक्रामक’ प्रकृति परिवर्तन नहुने प्रतिक्रिया दिएकी थिइन्। उनले अमेरिकी कदमलाई सद्भावनाको संकेतका रूपमा स्वीकार नगर्ने बताएकी थिइन्।
क्षेप्यास्त्र प्रहार चिनियाँ विदेशमन्त्री वाङ यीको दक्षिण कोरिया भ्रमणसँग पनि मेल खाएको छ। वाङ यीले अगस्ट १९ र २० मा सोलको दुईदिने भ्रमण गरी क्षेत्रीय सुरक्षा तथा कोरियाली प्रायद्वीपको अवस्थाबारे छलफल गरेका थिए।
यसअघि उत्तर कोरियाले अगस्ट १२ मा पनि छोटो दूरीको ब्यालिस्टिक क्षेप्यास्त्र प्रहार गरेको थियो। दक्षिण कोरियाको राष्ट्रिय सुरक्षा कार्यालयले प्रक्षेपणपछि आकस्मिक सुरक्षा बैठकसमेत आयोजना गरेको छ। सोलले उत्तर कोरियाको ब्यालिस्टिक क्षेप्यास्त्र प्रहारलाई संयुक्त राष्ट्रसंघ सुरक्षा परिषद्का प्रस्तावविपरीतको गम्भीर गतिविधि भन्दै तत्काल रोक्न आग्रह गरेको छ।
.png)
.jpg)
.jpg)
.jpg)
.jpg)
प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।