टक्सार पिखुवा खोलाको १.४९ लाख कित्ता सेयरको लकइन खुल्दै

काठमाण्डौ । टक्सार पिखुवा खोला हाइड्रोपावर लिमिटेडको सामूहिक लगानी कोषको स्वामित्वमा रहेको १ लाख ४९ हजार ३२ कित्ता सेयरको लकइन अवधि सकिने भएको छ।

कम्पनीले सार्वजनिक गरेको सूचनाअनुसार उक्त सेयरको लकइन अवधि २०८३ मंसिर ५ गतेपछि समाप्त हुनेछ। लकइन अवधि सकिएसँगै ती सेयर दोस्रो बजारमा कारोबारका लागि योग्य हुनेछन्। 

कम्पनीले सर्वसाधारणमा सार्वजनिक निष्कासन गर्दा सामूहिक लगानी कोषका लागि छुट्याइएको सेयरमध्ये सुरुमा १ लाख ५१ हजार ५३३ कित्ता सेयर बाँडफाँड गरेको थियो।

तर सामूहिक लगानी कोषका दुईवटा योजनाहरू परिपक्व भइसकेपछि नेपाल धितोपत्र बोर्डको व्यवस्थाबमोजिम ती योजनाको स्वामित्वमा रहेको २ हजार ५०१ कित्ता सेयर लकइन अवधि अगावै फुकुवा गरिएको थियो। त्यसपछि हाल लकइनमा रहेको सेयर संख्या १ लाख ४९ हजार ३२ कित्तामा झरेको हो।

कम्पनीले नियमअनुसार लकइन अवधि सकिनुअघि नै सेयरधनी तथा लगानीकर्तालाई जानकारी गराएको जनाएको छ। कम्पनीको सेयर निष्कासन तथा बिक्री प्रबन्धक एनएमबि क्यापिटल लिमिटेड रहेको छ।