राष्ट्रपतिद्वारा धारा ७६(२) अनुसार नयाँ सरकार गठनको आह्वान, आइतबार साँझसम्मको समय

काठमाण्डौ । राष्ट्रपति रामचन्द्र पौडेलले नेपालको संविधानको धारा ७६ को उपधारा २ अनुसार नयाँ सरकार गठनका लागि आह्वान गरेका छन्।

राष्ट्रपति पौडेलले संविधानको धारा ७६(२) बमोजिम बहुमतको प्रधानमन्त्रीमा दाबी गर्न आह्वान गर्दै आइतबार साँझ ५ बजेसम्मको समय समेत दिएका छन् । 

धारा ७६ को उपधारा २ मा प्रतिनिधिसभाका दुई वा दुईभन्दा बढी दल मिलेर सरकार बनाउनसक्ने व्यवस्था छ । यही व्यवस्थाअनुसार राष्ट्रपति सरकार गठनका लागि आह्वान भएको हो ।  

यो आह्वानसँगै राजनीतिक वृत्तमा देखिएको अन्यौल अन्त्य भएको छ । अब केपी ओली प्रधानमन्त्री बन्ने बाटो खुलेको छ ।  

कांग्रेसको समर्थनमा प्रधानमन्त्री बन्न लागेका केपी ओलीले आजै राष्टपति कार्यालयमा सरकार गठनका लागि दाबी पेश गर्ने कार्यक्रम रहेको छ । त्यसका लागि आवश्यक कागजात ठीक्क पारेर राखिएको छ ।  

आज पेश भएको दाबीअनुसार रातिसम्म नै राष्ट्रपतिले ओलीलाई नयाँ प्रधानमन्त्री नियुक्त गर्ने अधिक सम्भावना रहेको छ ।  

भोलि(शनिवार) नवनियुक्त प्रधानमन्त्रीको रुपमा ओलीको सपथ ग्रहण हुनेछ ।