ग्राउण्ड जिरोका लगानीकर्ताबीच मौद्रिक नीति र नयाँ सरकारको चर्चा, भन्छन् ‘अब सेयर किन्न आँट चाहिन्छ ’

STOCK MARKET
आईतवार, असार ३०,२०८१ 17:24:31

काठमाण्डौ । हामीले नियमित स्तम्भ ग्राउण्ड जिरोलाई यो साता पनि निरन्तरता दिएका छौं । यसै सिलसिलामा आज हामी त्रिपुरेश्वर, सुन्धारा तथा पुतलिसडमा अवस्थित ब्रोकर हाउसहरुमा पुगेर लगानीकर्ता तथा ब्रोकरहरुको विचारलाई समेटेका छौ । त्रिपूरेश्वरस्थित इन्भेष्टमेन्ट म्यानेजमेन्ट प्रालि (स्टक ब्रोकर नम्बर ५३)बाट हामीले ग्राउण्ड जिरोको थालनी गरेका थियौ ।

आज बजार बिहान प्रि–ओपन सेसनमा नै करिब ३५ अंकले बढेको थियो । ब्रोकर हाउसमा लगानीकर्ताहरु आउने क्रम जारी थियो । गत शुक्रबार बढेर बन्द भएको बजारमा आज के हुने हो भनेर लगानीकर्ता उत्साहित देखिन्थे । यसैबीच एक महिला लगानीकर्ता अभिवादन गर्दै ब्रोकर हाउस छिरिन् । ‘ यो बजार पनि बुझ्नै नसकिने रहेछ । म त बजारमा छिरेको १५/२० वर्ष भयो । कति कमाइयो. कति गुमाइयो हिसाब नै छैन, ’ उनले वार्तालापको सुरुवात गर्दै भनिन् ।

उनको नजिकै बसेका एक पुरुष लगानीकर्ताले भने ‘म त २८ सयमा छिरेको सबै लगानी आधा भएको छ । कहिले आउने होला साँवा ?’ उनलाई जबाफ दिँदै ती महिला लगानीकर्ताले भनिन् ‘यो बजारमा सबैले डुबेर नै सिक्ने हो । हामी पनि डुबेका नै छौं । एकपटक त बढ्छ पक्कै । चिन्ता नलिनुस् ।’

आज पहिलो प्रहरमा करिब ३ अर्बको कारोबार भएको थियो भने बजार पनि ८० अंक भन्दा बढीले बढेको थियो । केही समयको बसाईपछि हामी सुन्धारास्थित सुन्धारा सेक्युरिटिज (स्टक ब्रोकर नम्बर ५२) मा पुग्यौं । यहाँ पनि लगानीकर्ताहरुको उपस्थिति राम्रै थियो । यस बेलासम्म भित्ताको घडिमा १२ बजिसकेको थियो भने बजार पनि करिब ४५ अंकले बढेर कारोबार हुँदै थियो । यस ब्रोकरमा भेटिएका लगानीकर्ता भने बजारप्रति निकै सकारात्मक देखिए ।

शुट पाइन्टमा ठटिएका एक लगानीकर्ताले निश्चिन्त हुँदै भने, ‘अब भने बजारले राम्रै गति लिन्छ । अहिले पैसा पनि फालाफाल छ, माहोल पनि बन्दै छ । अब संस्थागत लगानीकर्ताहरुले पनि लगानी गर्दै छन् । मौद्रिक नीति पनि लचक आउँला जस्तो छ । संस्थागत लगानीकर्तामाथिको क्याप हटाउने, जोखिमभार एक सयमा ल्याउने र विजनेस लोनलाई सहज भयो भने त बजारलाई राम्रै हुन्छ ।’ ती लगानीकर्ताले थपे, ‘अब लगानीकर्ताहरुमा पनि आँट चाहियो । सेयर बजारमा चाहिने मुख्य कुरा भनेको आँट पनि हो । लौ हेर्नुहोस ब्रोकर हाउसमा पनि लगानीकर्ताको संख्या बढ्दै गएको छ । यी सबै विषय केलाउदा अब बजारले गति लिने देखिन्छ ।’

हामीले केही समय ब्रोकर सञ्चालकसँग पनि बजारको पछिल्लो अवस्थाबारे जिज्ञासा राख्यौं । पछिल्लो अवस्थामा बजारमा माहोल बन्दै गरेको र लगानीकर्ताको मनोबल बढेको जानकारी ब्रोकर सञ्चालकले दिए । यसै ब्रोकरमा केही लगानीकर्ता डोनाल्ड ट्रम्पमाथि भएको गोली प्रहारका बारेमा समेत चर्चा गर्दै थिए ।

केही समयको बसाईपछि हामी एबीसी सेक्युरिटिज (स्टक ब्रोकर नम्बर १७)तर्फ लम्कियौं । यहाँ पनि लगानीकर्ताहरुको उपस्थिति राम्रै थियो । यस बेलासम्म दिनको १ बजिसकेको थियो । ब्रोकर हाउमा फोनका घण्टी बज्दै थिए । यसै ब्रोकरमा भेटिएका एक लगानीकर्ताले बजार बढ्न एउटा निहुँ मात्रै चाहिएको बताए । ‘सबै विषय सकारात्मक रहेका छन् । लगानीकर्ताहरुमा मनोबल मात्रै कमजोर बनेको थियो । अब माहोल बनेको छ,’ उनले भने, ‘हेरौ अब त बजारको सिजन पनि सुरु भयो । बजारमा यो पटक केही होला जस्तो छ । उनले थपे, ‘२२७८ विन्दुमा नेप्सेको खड्को छ भन्छन् । यहाँबाट माथि गए त बजार राम्रै अंकले माथि जान्छ ।’

केही समयको बसाईपछि यहाँबाट हामी पुतलीसडकस्थित प्राइमो सेक्युरिटिज (स्टक ब्रोकर नम्बर १६) मा पुग्यौ । यहाँ भेटिएका लगानीकर्ताहरुले आउँदै गरेको मौद्रिक नीति र नयाँ सरकारको विषया चर्चा गरेको पाइयो । यसै ब्रोकरमा भेटिएका एक लगानीकर्ताले भने,‘आउने महिना मौद्रिक नीति पनि आँउदै छ भन्छन्, के कस्तो आउने हो ?’ उनको जिज्ञासा मेटाउँदै सँगैका लगानीकर्ताले भने, ‘ केही न केही लचक त अाँउछ नै । धेरै अपेक्षा पनि नगरौं । यो गभर्नरको पनि अब धेरै समय छैन । त्यहीमाथि सरकार पनि फेरिदै छ । अब भने सेयर बजारले गति लिन्छ ।’