सेयर बजार चम्कदा टीएमएसको समस्याबाट लगानीकर्ता आजित, सिस्टम नै कब्जा गरेको आरोप

STOCK MARKET
आईतवार, श्रावण १३,२०८१ 18:49:55

काठमाण्डौ । नेपालको सेयरबजारमा गिरावट आउँदा वा बजार साइडवेजमा चल्दा कारोबारसम्बन्धी समस्याहरु त्यति धेरै सुन्न वा देख्न पाइदैन । तर बजार जब–जब बढ्न थाल्छ अनि लगानकिर्ताहरुले कारोबार गर्दा समस्याहरु झेल्नुपर्ने हुन्छ । बजारको वृद्धिले नेपाली बजारको कारोबारसम्बन्धी समस्याहरु उदाङ्गो पारिदिन्छ ।

यसलाई विगतका घटनाले पृष्टि गर्छ । यस्तै समस्या आजको नेप्सेको बढोत्तरीमा समेत देखिएको छ । आज पनि दोस्रो सर्किट लागेर बजार खुलेपछि केही समय लगानीकर्ताहरुले टीएमएस नै नखुल्ने तथा घुमिरहने समस्या देखिएको गुनासो गरे । नेप्सेलेप्रति सेकेण्ड लाखौ अडर राख्न मिल्ने बताएता पनि धरै लगाीकर्ताहरुले टीएमएस खोलेको अवस्थामा नेप्सको टीएमएसले बेला–बेलामा लगानीकर्ताहरुले सास्ती पाएका छन् । आज धेरै जस्तो ब्रोकरहरुको टीएमएसमा समस्या देखिएको थियो । टीएमएसमा समस्या देखिएपछि लगानीकर्ताहरुले सामाजिक सञ्जालमार्फत आक्रोस पनि पोखेका थिए । केहीले भने समस्या देखिएको र समाधान गर्न भन्दै नेप्सेमा इमेल पनि पठाएका थिए ।

बजार बढेको बेला यसरी टीएमएसमा समस्या आउनुमा सरोकारवालाहरुले एक अर्कालाई दोषारोपण गरेर उम्कन खोजेको देखिन्छ । समस्या देखिनुमा ब्रोकरहरुले वाइको कम्पनी र वाइकोेले ब्रोकरुहरुलाई आरोप लगाउँदै आएका छन् । वाइको भन्छ, ‘ब्रोकरहरले लगानीकर्ता मात्रै थपे तर आफ्नो क्षमता भने अभिवृद्धि गरेनन् । त्यही कारण समस्या देखिएको हो ।’

तर ब्रोकरहरु भने यो आरोप स्विकार्न तयार छैनन् । हाल बजार खुल्दा ११ बजेदेखि ३ बजेसम्म २२ लाख लगानीकर्ताहरुले एकैपटक पनि टीएमएस खोल्ने गरेका छन् ।

स्टक ब्रोकर एसोसियशन अफ नेपालका अध्यक्ष धर्मराज सापकोटा नयाँ टीएमएसको विकल्प नहुँदा लगानीकर्ताहरुले पुरानो टीएमएसबाट समस्या भोगेको बताउँछन् । ‘लगानीकर्ताहरुले टीएमएसमा झेलेको समस्या पुरानै हो। हामी विकल्प दिन प्रयासरत छौ । तर हाम्रो टीएमएस पनि समयमा आउन सकेन ।’ सापकोटाले भने, ‘अब भने छिट्टै ल्याउने तयारी हुँदैछ ।’

नेप्सेका प्रवक्ता मूराहरी पराजुलीले भने टीएमएमा समस्या रहेको तथ्य अस्वीकार गरेका छन् । उनी भन्छन् ‘हामीले पनि कारोबार समयमा निगरानी गर्छौं । हाम्रो कारणले टीएमएसमा समस्या छैन ।’

सामाजिक सञ्जालमा भने केही लगानीकर्ताहरुले बजार बढ्दा टीएमएसमा समस्या ल्याएर सिस्टम नै कब्जा भएकोसम्म आरोप लगाएका छन् ।