सुन तस्करीको अखडा बन्न थालेपछि युएईले लगायो करिब ३ दर्जन सुन प्रशोधनकर्तामाथि प्रतिबन्ध

Money Market
आईतवार, श्रावण २७,२०८१ 14:30:49

काठमाण्डौ । संयुक्त अरब इमिरेट्स(युएई)ले करिब ३ दर्जन सुन प्रशोधनकर्तालाई प्रतिबन्ध लगाएको छ । युएईले सम्पत्ति शुद्धिकरणको मामिलामा ३२ वटा गोल्ड रिफाइनरीमा अल्पकालिन प्रतिबन्ध लगाएको हो ।

युएईको अर्थमन्त्रालयले एक विज्ञप्ती जारी गर्दै आर्थिक अपराध पत्ता लगाउन तथा न्यूनिकरण गर्ने अभियानअन्तर्गत ३२ वटा रिफाइनरीको गतिविधिमा रोक लगाइएको जनाएको छ । देशको सुन क्षेत्रको करिब ५ प्रतिशत हिस्सा ओगट्ने ३२ वटा रिफाइनरीको गतिविधि आगामी अक्टोबर २४ सम्मका लागि रोकिएको छ ।

सरकारी अधिकारीहरुले यी प्लान्टहरुले २५६ वटा नियमको उल्लंघन गरेको बताएका छन् । जसमा जोखिम पहिचानका लागि आवश्यक कदम नचालेको र आतंकवादका विरुद्ध ग्राहकहरुको कारोबारको डेटाबेस परीक्षण नगरेको जस्ता विषय छन् ।

युएईले सम्पत्ति शुद्धिकरण र सुन तस्करका विषयमा आँखा चिम्लिरहेको छ भन्ने आरोपका बीच युएई सरकारले वित्तीय स्वच्छताका लागि नयाँ कदम चल्न थालेको जनाइएको छ ।

स्विस एडको प्रतिवेदनका अनुसार सन् २०२२ मा युएईमा अफ्रिकाबाट आयात भएको कुल सुनको दुई तिहाई हिस्सा तस्करीको थियो । त्यसरी तस्करी भएको सुन पछि स्विट्जरल्याण्ड लगायतका देशमा निर्यात भएको थियो ।