ग्राउण्ड जीरो: ब्रोकरहाउसमा देखियो दशैं प्रभाव, बजारमा भने चमक फर्किने संकेत

काठमाण्डौ । साप्ताहिक समाचार स्तम्भ ग्राउण्ड जीरोका लागि आज हामीले काठमाण्डौका पुतलीसडक र कमलादी आसपासका ब्रोकर हाउसहरुमा पुगेर लगानीकर्ता तथा ब्रोकरहरुको मनोभाव बुझ्ने कोशिश गरेका छौं ।  

दशैं लागेर पनि होला आज ब्रोकर हाउसहरुमा लगानीकर्ताहरुको उपस्थिति निकै कम थियो । सडकमा भने थामिनसक्नुको भीडभाड । हामी सबैभन्दा पहिला सानिमा सेक्यूरिटिज(स्टक ब्रोकर नम्बर ८३)मा पुग्यौं । यहाँ लगानीकर्ताको उपस्थिति औसत मात्र थियो । कारोबारको पहिलो सत्रमा बजार केही अंकले घटेको थियो । यही प्रसंगलाई जोडेर एक लगानीकर्ताले भने-'आजको बजार महत्वपूर्ण हुनेवाला छ । आज बढेर बन्द भयो भने त बजार माथि नै जान्छ । तर बजार बढ्ला जस्तो छैन ।' 

सँगै बसेका अर्का लगानीकर्ताले उनलाई जवाफ दिंदै भनेका थिए-'अन्तिमसम्म हेर्ने धैर्य गरौं साथी ।'  

यही ठाउँमा भेटिएका एक लगानीकर्ताले ठूलो ठानिएको नासा सेक्यूरिटिज पनि शिवम सिमेन्ट, एचआरएल जस्ता कम्पनीमा फसेको सुनाइरहेका थिए ।  

अर्का एक लगानीकर्ताले पहिलो त्रैमासिक रिपोर्ट केही सुधारोन्मुख आउने तर्क गरे । उनले थप्दै भने-'कर्जाको माग खासै बढ्न सकेको छैन  मौद्रिक नीतिमा वर्किङ क्यापिटल गाइडलाइन केही लचक भएर आउनुपर्छ । त्यसपछि त बजार निकै माथि जान्छ ।'  

ब्रोकर हाउसमा यस्तै गफगाफ चल्दै थियो, बजार पनि दशैंको पिङ झैं तलमाथि मच्चिरहेको थियो । एकघण्टामा एक अर्ब ४० करोडको कारोबार भएको थियो ।  

त्यहाँबाट हामी श्वेता सेक्यूरिटिज(स्टक ब्रोकर नम्बर २५)मा पुग्यौं । यहाँ पनि लगानीकर्ताहरुको उपस्थिति निकै कम थियो । केही उपस्थित लगानीकर्ता बजारप्रति खासै विश्वस्त देखिरहेका थिएनन् । आफूहरुलाई फाइनान्सको कारोबारी(आर्मी) बताउने ती लगानीकर्ताले केही कम्पनीको सेयर बेचेको बताए । उनले टीएमएस देखाउँदै भने-'लौ हेर्नुहोस मैले त बेचेँ ।  इजरेल र इरानको युद्ध पनि चलेको छ । अब जति बढे पनि बढोस् । मंसिरतिर सेयर किन्नु पर्ला ।'

उनीसँगै बसेका लगानीकर्ताले पनि आफूले दशैं खर्च उठाउन भ्याएको सुनाए । उनले थप्दै भने-'साहास बढेको बढ्यै छ । लकिङ खुलेको सेयर झनै बढेको छ ।' 

उनले पनि एकदुईदिन सेयर किन्नलाई विचार गर्नुपर्ने तर्क पेश गरेका थिए । यस बेलासम्म दिनको एक बजिसकेको थियो । बजार सामान्य अंकले बढ्दै थियो भने ब्रोकर हाउसहरु सुनसान थिए ।  

केही समयको बसाइँपछि हामी यहाँबाट कमलादीमा रहेको मल्ल एण्ड मल्ल सेक्यूरिटिज(स्टक ब्रोकर नम्बर ११) मा पुग्यौं । यहाँ पनि पहिलेको तुलनामा लगानीकर्ताहरुको संख्या कमै थियो । यसै ब्रोकरमा भेटिएका लगानीकर्ताहरुले बिकास बैंक किन्नुपर्ने तर्क गर्दै थिए । एक लगानीकर्ताले भने-'बढेछ भने बढेर नै किनौला, आजको बजारलाई हेरौं न । आज २५८० बाट फर्केको छ । २६५० माथि पुगेछ भने चाहिँ बिचार गर्नुपर्ला ।'  

उनीसँगै बसेका एक लगानीकर्ताले भने-'अरुले किन्न थालेपछि त हामीले बेच्नुपर्छ । ब्रोकरहरुले उधारो लिमीट केही खुकुल्लो गरेका छन् भन्छन् । बजार अब दशैं अगाडि राम्रैसँग बढ्नसक्छ।'  

यहाँबाट हामी कमलादिमा नै रहेको कोहिनूर सेक्यूरिटिज(स्टक ब्रोकर नम्बर ३५) मा पुग्यौं । यहाँ पनि लगानीकर्ताहरुको सँख्या निकै कम थियो । यसबेलासम्म दिनको २  बजिसकेको थयो । बजार बिस्तारै माथिको यात्रा गर्दै थियो । हामीले केही समय ब्रोकर सञ्चालकसँग कुराकानी गर्यौं । त्यहाँ भेटिएका ब्रोकरले सबैखालका दवाब सकिएका कारण अब बजारले राम्रै गति लिने अनुमान हामीलाई सुनाए ।