लगानीकर्तालाई दशैं लाग्दा नेप्से राताम्मे, फूल्लेल भन्छन्- 'दशैंपछि बजारले लय लिन्छ'

काठमाण्डौ । लगानीकर्ताहरु दशैं मनाउनतर्फ लाग्दा मंगलबार सेयर बजार सेलाएको छ ।  

कतिपय लगानीकर्ताहरु काठमाण्डौ वा यस्तै शहरी क्षेत्रमा बस्ने र पर्व मनाउन गाउँ तथा अन्य गन्तव्यमा पुग्ने चटारो हुँदा सेयर बजारमा ध्यान दिन सक्दैनन् । लगानीकर्तालाई दशैं लाग्दा यसको प्रभाव बजारमा पनि देखिएको हो । जसको फलस्वरुप बजार परिसूचक(नेप्से) यो दिन २७.३९ अंकले घटेर २६६३.३२ अंकमा खुम्चिएको छ ।  

अघिल्लो दिनको तुलनामा यो दिन कारोबार रकममा पनि संकुचन देखिएको छ । यो दिन ३०० कम्पनीको १ करोड ३ लाख ३० हजार ५०२ कित्ता सेयर ४ अर्ब ५९ करोड ३७ लाख २७ हजारमा किनबेच भएको छ । 

विगत केही दिनदेखि उछालको गतिमा दौडिएको फाइनान्स उपसमूहमा लगानीकर्ताहरुले प्रफिट बुक गर्दा समेत आजको बजारमा केही सुस्तता देखिएको हो । यो दिन सबैभन्दा बढी गुमाउनेमा पनि फाइनान्स समूहकै लगानीकर्ता छन् । फाइनान्स उपसमूहको सूचक यो दिन सबैभन्दा धेरै २.७६ प्रतिशतले करेक्सन भयो ।  

बजारका अन्य सबै उपसमूहको सूचकमा पनि आज रातो पोतियो ।  

बैंकिंग समूह ०.३६ प्रतिशतले घटेको यो दिन विकास बैंक समूहमा १.१७ प्रतिशत, होटल र टुरिजममा १.९३ प्रतिशत, जलविद्युत समूहमा १ प्रतिशत, इन्भेष्टमेन्ट समूहमा १.४५ प्रतिशत, जीवन बीमा समूहमा १.०७ प्रतिशत, उत्पादन तथा प्रशोधन समूहमा १.७५ प्रतिशत, माइक्रोफाइनान्समा ०.९१ प्रतिशत र निर्जीवन बीमा समूहमा १.४५ प्रतिशतको गिरावट आयो ।  

सेयर लगानीकर्ता संघका कार्यवाहक अध्यक्ष ताराप्रसाद फूल्लेलले दशैंका लागि धेरै लगानीकर्ता काठमाण्डौ बाहिर गएका र असोज मसान्तको दवाबले समेत बजारमा बिक्री चाप देखिएको बताए । उनले दशैं पछिदेखि बजारले लय समात्ने प्रक्षेपण समेत गरेका छन् ।  

धेरै कारोबार गर्ने कम्पनी

यो दिन एनएलजी इन्स्योरेन्सको  सबैभन्दा बढी २७ करोड १७ लाख बढीको कारोबार भयो ।  

नेपाल फाइनान्सको २३ करोड ९७ लाख कारोबार भयो भने हिमालयन रिइन्स्योरेन्सले करिब १४ करोड बराबरको कारोबार गर्यो । 

धेरै कमाउने र गुमाउने कम्पनी

कारोबारमा आएका ३०० मध्ये २०७ कम्पनीको मूल्य घटेको दिन ३५ कम्पनीको सेयरमूल्य भने बढ्यो ।  

यो दिन मिड सोलू हाइडोपावरमा अपर सर्किट लाग्यो । बुटवल पावर कम्पनीको सेयरमूल्य ७ प्रतिशत हाराहारीमा बढ्यो भने माण्डू हाइडोपावरको मूल्य ६.३१ प्रतिशतले उचालियो ।  

यो दिन इस्टर्न हाइडोपावरको मूल्य सबैभन्दा बढी ८.५० प्रतिशतले घट्यो । बुद्धभूमि नेपाल हाइडोपावर र नेपाल फाइनान्सका लगानीकर्ताले समेत यो दिन ७ प्रतिशत हाराहारीमा सम्पत्ति गुमाए ।