हालसम्म कुन हाईड्रो कम्पनीले कति घोषणा गरे लाभांश ? कति वटाको बाँकी ?

काठमाण्डो । नेप्सेमा सूचीकृत ९१ वटा हाईड्रो कम्पनीमध्ये हालसम्म ९ वटाले मात्रै लाभांश घोषणा गरेका छन् । जसमध्ये एउटा कम्पनीले नगद लाभांश मात्रै, २ वटाले बोनस सेयर मात्रै र ६ वटाले नगद र बोनस सेयर दुवै दिने प्रस्ताव गरेका छन् ।  

हालसम्म लाभांश घोषणा गर्नेमा साहस उर्जा, सिईडिबि हाईड्रोपावर, भगवति हाईड्रोपावर, माण्डु हाईड्रोपावर, सुपरमाई हाईड्रोपावर, अपि पावर कम्पनी,मन्दाकिनी हाईड्रोपावर, सुपरमाई हाईड्रोपावर र रुरु जलविद्युत परियोजना रहेका छन् ।  

कुन कम्पनीले कति दिदैछन् लाभांश ?

साहस उर्जा लिमिटेड

साहस उर्जाले आव २०८०/८१ का लागि ८ प्रतिशत बोनस सेयर र ०.४२१ प्रतिशत नगद लाभांश(कर प्रयोजनका लागि( गरी कुल ८.८२१ प्रतिशत लाभांश वितरण गर्ने गर्ने निर्णय गरेको छ ।    

 

। 

सिईडिबि हाईड्रोपावर डेभलपमेन्ट कम्पनी लिमिटेड

कम्पनीले आव २०७९/८० र २०८०/८१ का लागि चुक्ता पुँजीको ११ प्रतिशत बोनस सेयर (कर बाहेक) जारी गर्ने निर्णय गरेको छ । कम्पनीको लाभांश गत असोज २१ गते बसेको साधारण सभाबाट पारित भईसकेको छ ।  

भगवती हाईड्रोपावर डेभलपमेण्ट कम्पनी

भगवती हाईड्रोपावरले आफ्ना सेयरधनीहरूलाई चुक्तापूँजीको ४ प्रतिशतले बोनस सेयर र १०.७३६८ प्रतिशत नगद लाभांश गरी कुल १४.७३६८ प्रतिशत लाभांश घोषणा गरेको छ । कम्पनीको लाभांश वितरणको प्रस्ताव गत असोज १६ गते सम्पन्न २४ औं वार्षिक साधारण सभाबाट पारित भईसकेको छ ।  

माण्डु हहाईड्रोपावर  

कम्पनीले आव २०८०/८१ को मुनाफाबाट सेयरधनीहरुलाई कम्पनीको हालको चुक्ता पुँजी १ अर्ब ३६ करोड ३६ लाख ३७ हजार रुपैयाँको १२ प्रतिशतले हुन आउने नगद लाभांश वितरण गर्ने निर्णय गरेको छ । कम्पनीको उक्त प्रस्ताव गत असोज १४ गते सम्पन्न १३ औं वार्षिक साधारण सभाबाट पारित भईसकेको छ ।  

सुपरमाई हाईड्रोपावर  

कम्पनीले आर्थिक वर्ष २०८०/८१ को खुद मुनाफाबाट सेयरधनीहरुलाई ७ प्रतिशत बोनस सेयर र ५.६३ प्रतिशत नगद लाभांश(कर प्रयोजनसहित)गरी कुल १२.६३ प्रतिशत लाभांश वितरणको प्रस्ताव गरेको छ ।  

अपि पावर कम्पनी लिमिटेड

अपि पावरले गत आवका लागि सेयरधनीहरुलाई ५ प्रतिशत बोनस सेयर वितरण गर्ने निर्णय गरेको छ । यसअघि भने कम्पनीले ९ प्रतिशत बोनस सेयर र कर प्रयोजनका लागि ०.४७३७ प्रतिशत नगद लाभांश वितरणको प्रस्ताव गरेको थियो । जसलाई विद्युत नियमन आयोगले अस्विकृत गरेको थियो ।  

मन्दाकिनी हाईड्रोपावर लिमिटेड

कम्पनीले सञ्चित मुनाफा समेतबाट चुक्ता पुँजीको ५ प्रतिशत बोनस सेयर र र ०.२६३२ प्रतिशत नगद लाभाशं (कर प्रयोजनका लागि) गरी कुल ५.२६३२ प्रतिशत लाभांश वितरणको प्रस्ताव गरेको छ ।  

सुपर मादी हाईड्रोपावर लिमिटेड

कम्पनीले गत आर्थिक वर्षका लागि सेयरधनीहरुलाई ५ प्रतिशत बोनस सेयर र प्रस्तावित बोनस सेयरको कर प्रयोजनका लागि ५५ लाख २६ हजार ३१६ रुपैयाँ नगद लाभांश घोषणा गरेको छ । लाभांश पारितको मुख्य अजेण्डासहित कम्पनीको १५ औं वार्षिक साधारण सभा कात्तिक ५ गते काठमाण्डौको बत्तिसपुतलीमा रहेको होटल इम्पेरियलमा आयोजना हुँदैछ ।  

रुरु जलविद्युत परियोजना लिमिटेड

कम्पनीले गत आर्थिक वर्ष २०८०/८१ सम्मको वितरणयोग्य मुनाफाबाट १५ प्रतिशत बोनस सेयर र ०.७८९ प्रतिशत नगद लाभांश(कर प्रयोजनका लागि) गरी कुल १५.७८९ प्रतिशत लाभांश घोषणा गरेको छ । कम्पनीले लाभांशको प्रस्ताव पारित गर्न कात्तिक ११ गते काठमाण्डौको नक्सालमा रहेको लिसरा रिसेप्सनमा १९ औं वार्षिक साधारण सभा डाकेको छ