चीन बाहेकका अन्य अधिकांश एशियाली चिप निर्माता कम्पनीको सेयरमा हरियाली

काठमाण्डौ । चीन बाहेकका अधिकांश एशियाली चिप स्टक आज वृद्धि भएका छन् । अमेरिकाले चिनियाँ चिप निर्माता कम्पनीहरुमाथि कडाई हुनसक्ने सम्भावना बढेसँगै चीनबाहेकका अन्य कम्पनीको सेयरमूल्य बढेको हो ।  

आज ताइवान सेमिकन्डक्टरको सेयरमूल्य २.४ प्रतिशतले बढेको छ । यो कम्पनी विश्वको सबैभन्दा ठूलो चिप आपूर्तिकर्ता हो ।  

यस्तै जापानका अधिकांश चिप निर्माता कम्पनीहरुको सेयरमूल्य पनि वृद्धि भएको छ । टोकियो इलेक्ट्रोनको मूल्य ४.७ प्रतिशत,लेजरटेकको ६.७ प्रतिशत,एड्भानटेस्टको ३.९ प्रतिशत र रेनेसास इलेक्ट्रोनको २.२ प्रतिशतले बढेको छ ।  

बेलायती चिप डिजाइनर आर्ममा स्वामित्व भएको सफ्ट बैंकको सेयरमूल्य पनि ३.६ प्रतिशतले बढेको छ ।  

यस्तै दक्षिण कोरियाको सामसुङ इलेक्ट्रोनिक्स र एसके हाईनिक्सको सेयरमूल्य पनि क्रमशः०.९ र १.८ प्रतिशतले उकालो लागेको छ ।  

अमेरिकाको वाणिज्य विभागले कटिङ ऐज चिप प्रविधिमा चीनको पहुँच रोक्न गत सोमबार १४० वटा नयाँ कम्पनमाथि कडाई गर्ने घोषणा गरेको थियो । यसमा चीनको ठूला कम्पनीहरु जस्तै नौरा टेक्नोलोजी र एसीएल रिसर्च पनि रहेका छन् । यी कम्पनीहरुको सेयरमूल्य आज क्रमश ३ र १ प्रतिशतले घटेको छ ।