गार्डियन माइक्रो लाइफको आइपीओमा १३.६५ गुणा बढी आवेदन, १७ लाख बढीको हात खाली हुने

काठमाण्डौ । गार्डियन माइक्रो लाइफ इन्स्योरेन्सको आइपीओमा अन्तिमदिनसम्म  १३.६५ गुणा बढी आवेदन परेको छ । सिडिएस एण्ड क्लियरिङ्ग लिमिटेडका अनुसार कम्पनीको आइपीओमा १९ लाख ०६ हजार ७४८ जनाले आवेदन दिएका हुन् ।  

कम्पनीको आइपीओमा २ अर्ब ५१ करोड ९० लाख ३६ हजार रुपैयाँ बराबरको २ करोड ५१ लाख ९० हजार ३६० कित्ताका लागि आवेदन परेको हो ।  

कम्पनीको आइपीओमा मागभन्दा बढी आवेदन परेको छ । आइपीओ पाउन भाग्यकै भर पर्नुपर्ने भएको छ । १ लाख ८४ हजार ५०० जनाले १० कित्ताका दरले सेयर प्राप्त गर्नेछन् भने बाँकी १७ लाख २२ हजार बढीको हात रित्तो हुनेछ ।  

कम्पनीले आम सर्वसाधारणका लागि पुष २१ गतेदेखि आईपीओ निष्कासन गरेको हो । निष्कासनका लागि अनुमति पाएको कुल २२ लाख ५० हजार कित्तामध्ये प्रथम चरणमा १० प्रतिशत अर्थात २ लाख २५ हजार कित्ता सेयर श्रम स्वीकृति लिई वैदेशिक रोजगारीमा रेहका नेपालीका लागि निष्कासन गरेको कम्पनीले ५ प्रतिशत अर्थात १ लाख १२ हजार ५ सय कित्ता सामूहिक लगानी कोष र ३ प्रतिशत अर्थात ६७ हजार ५ सय कित्ता कर्मचारीका लागि छुट्टाई बाँकी रहेको १८ लाख ४५ हजार कित्ता आम सर्वसाधारणका लागि निष्कासन गरिएको हो ।  

कम्पनीको आईपीओ निष्कासन तथा बिक्री प्रबन्धकको रुपमा कुमारी क्यापिटल लिमिटेड रहेको छ ।