महुली लघुवित्तको नाफामा ६५.६८% को गिरावट, वितरणयोग्य मुनाफा रु.७५.८७ लाख

काठमाण्डौ । महुली लघुवित्त वित्तीय संस्था लिमिटेडको नाफा ६५.६८ प्रतिशतले घटेको छ । संस्थाले चालु आवको दोस्रो त्रैमाससम्म ८९ लाख ५९ हजार रुपैयाँ खुद नाफा आर्जन गरेको छ । अघिल्लो आवको सोही अवधिसम्म भने संस्थाले २ करोड ६१ लाख रुपैयाँ नाफा आर्जन गरेको थियो ।  

अन्य सञ्चालन खर्च बढ्नर, इम्पेयरमेन्ट चार्ज बढ्नु र खुद शुल्क तथा कमिशन घटनु जस्ता कारणले संस्थाको नाफामा गिरावट आएको हो । समीक्षा अवधिसम्म संस्थाले १६ करोड ४८ लाख रुपैयाँ खुद ब्याज आम्दानी गरेको छ । जुन अघिल्लो आवको तुलनामा ३४.७७ प्रतिशतले बढी हो । अघिल्लो आवको दोस्रो त्रैमाससम्म संस्थाले १२ करोड २३ लाख रुपैयाँ खुद ब्याज आम्दानी गरेको थियो । यो अवधिमा संस्थाले २ करोड ३ लाख रुपैयाँबराबरको खुद शुल्क तथा कमिशन आर्जन गरेको छ । अघिल्लो आवमा भने संस्थाको यस्तो आम्दानी २ करोड ६८ लाख रुपैयाँ थियो ।  

यो अवधिमा संस्थाको कुल सञ्चालन आम्दानी पनि १४.२७ प्रतिशतले घटेर १२ करोड ६९ लाख रुपैयाँमा सीमित बनेको । संस्थाको सञ्चालन मुनाफा १ करोड २७ लाख रुपैयाँ रहेको छ ।  

दोस्रो त्रैमाससम्म संस्थाले कर्मचारीका लागि ८ करोड ७७ लाख रुपैयाँ खर्च गरेको छ । संस्थाको अन्य सञ्चालन खर्च २ करोड १० लाख रुपैयाँबाट बढेर २ करोड ४० लाख रुपैयाँ पुगेको छ ।  

समीक्षा अवधिसम्म संस्थाको रिटेन्ड अर्निङ घटेको छ भने रिजर्भको आकार बढेको छ । रिटेन्ड अर्निङ २ करोड ६४ लाख रुपैयाँबाट घटेर ७५ लाख ८७ हजार रुपैयाँ  कायम भएको छ । रिजर्भको आकार भने २८ करोड ५८ लाख रुपैयाँबाट बढेर ३१ करोड २५ लाख रुपैयाँ पुगेको छ ।  

संस्थाको वितरणयोग्य मुनाफा ७५ लाख ८७ हजार रुपैयाँ र वार्षिक वितरणयोग्य प्रतिसेयर आम्दानी ४.७१ रुपैयाँ रहेको छ । १ अर्ब ७० करोड रुपैयाँ निक्षेप संकलन गरेको संस्थाले ४ अर्ब ७५ करोड रुपैयाँबराबरको कर्जा प्रवाह गरेको छ ।  

संस्थाले इम्पेयरमेन्ट चार्जका लागि ५ करोड ८२ लाख रुपैयाँ छुट्टाएको छ । अघिल्लो आवको दोस्रो त्रैमाससम्म भने संस्थाले इम्पेयरमेन्ट चार्जका लागि १ करोड १८ लाख रुपैयाँ छुट्टाएको थियो । यो अवधिमा संस्थाको खराब कर्जा अनुपात ४.६४ प्रतिशतबाट बढेर ४.८९ प्रतिशत पुगेको छ ।  

समीक्षा अवधिसम्म संस्थाको प्रतिसेयर आम्दानी(ईपीएस) १६.२० रुपैयाँबाट घटेर ५.५६ रुपैयाँमा सीमित बनेको छ । संस्थाको प्रतिसेयर नेटवर्थ १९९.३१ रुपैयाँ, प्रतिसेयर कुल सम्पत्तिको मूल्य १ हजार ६३९.५७ रुपैयाँ, मूल्य आम्दानी अनुपात २५६.०३ गुणा र तरलता अनुपात १४.६४ प्रतिशत कायम भएको छ ।