सन नेपाल लाइफको नाफा १४.०४% ले घट्यो, कुल खर्च ५५.५७% ले वृद्धि

काठमाण्डौ । सन नेपाल लाइफ इन्स्योरेन्स कम्पनी लिमिटेडले चालु आर्थिक वर्ष २०८१÷८२ को दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ । जसअनुसार कम्पनी २८ करोड २२ लाख रुपैयाँ खुद नाफा आर्जन गर्न सफल भएको छ । यो नाफा अघिल्लो आवको सोही अवधिको तुलनामा १४.०४ प्रतिशतले कम हो । अघिल्लो आवको दोस्रो त्रैमाससम्ममा कम्पनीले ३२ करोड ८४ लाख रुपैयाँ खुद नाफा आर्जन गरेको थियो।    

कम्पनीको खुद बीमाशुल्क आम्दानी भने ३७.८० प्रतिशतले बढेको छ । दोस्रो त्रैमाससम्म कम्पनीले २ अर्ब १८ करोड रुपैयाँबराबरको खुद बीमाशुल्क आर्जन गरेको छ । अघिल्लो आवको दोस्रो त्रैमाससम्म कम्पनीले १ अर्ब ५८ करोड रुपैयाँबराबरको खुद बीमाशुल्क आर्जन गरेको थियो ।  

यस्तै, समिक्षा अवधिसम्म कम्पनीले लगानी कर्जा तथा अन्यबाट हुने आय बापत ४३ करोड ७८ लाख रुपैयाँ,अन्य प्रत्यक्ष आम्दानीबाट ९१ लाख १० हजार र बीमितलाई प्रदान गरिएको कर्जाबाट १ करोड ६२ लाख रुपैयाँबराबरको आम्दानी गरेको छ । कम्पनीको कुल आम्दानी २ अर्ब ९४ करोड रुपैयाँ रहेको छ ।  

त्यस्तै समीक्षा अवधिमा कम्पनीले २ अर्ब १४ करोड रुपैयाँ खुद दाबी भुक्तानी गरेको छ। जुन अघिल्लो आवको तुलनामा ६५.४थ्६ प्रतिशतले धेरै हो ।  

कम्पनीले समीक्षा अवधिसम्म २ अर्ब ६५ करोड रुपैयाँबराबरको कुल खर्च गरेको छ। यो रकम अघिल्लो आवको तुलनामा ५५.४७ प्रतिशतले बढी हो । अघिल्लो आवसम्म कम्पनीको कुल खर्च १ अर्ब ७१ करोड रुपैयाँ थियो। कम्पनीको महाविपत्ती कोषको आकार १८ करोड ९१ लाख रुपैयाँबराबर रहेको छ । यस्तै कम्पनीको रिटेन्ड अर्निङ ७७ करोड १७ लाख रुपैयाँ र सेयर प्रिमियम शीर्षकमा १ अर्ब २६ करोड रुपैयाँ रहेको छ ।  

कम्पनीको प्रतिसेयर आम्दानी(ईपीएस)१४.२५ रुपैयाँ, प्रतिसेयर नेटवर्थ १६६.१२ रुपैयाँ,प्रतिसेयर कुल सम्पत्तिको मूल्य ४०६.१७ रुपैयाँ र पीई अनुपात ४२.९५ गुणा कायम भएको छ ।