कर्जा पुनर्संरचनाको सुविधाले लघुवित्त संस्थाहरुको नाफा ५०.४७% ले बढ्यो, ३० संस्थाले घटाए खराब कर्जा

काठमाण्डौ । लघुवित्त वित्तीय संस्थाहरुको वित्तीय अवस्था सुधारिएको छ । नेपाल राष्ट्र बैंकले दिएको कर्जा पुनर्संरचनाको सहुलियतले लघुवित्त संस्थाहरुको खुद नाफामा सुधार देखिएको छ ।  

चालु आर्थिक वर्षको दोस्रो त्रैमाससम्म नेप्सेमा सूचीकृत ५० लघुवित्त संस्थाले २ अर्ब ७८ करोड १५ लाख रुपैयाँ नाफा कमाएका छन् । यो नाफा गत आवको सोही अवधिसम्मको तुलनामा ५०.४७ प्रतिशत बढी हो ।

गत आवको दोस्रो त्रैमाससम्म लघुवित्त संस्थाहरुले १ अर्ब ८४ करोड ८५ लाख रुपैयाँ नाफा कमाएका थिए । दोस्रो त्रैमाससम्म आइपुग्दा ७ वटा संस्था मात्रै घाटामा रहेका छन् । गत आवको दोस्रो त्रैमाससम्म भने १२ वटा संस्थाले घाटा ब्यहोरेका थिए ।  

समिक्षा अवधिसम्म आइपुग्दा नाफामा उक्लिएका ४२ वटा संस्थामध्ये पनि ६ संस्थाको मात्रै नाफा घटेको छ भने ३६ वटाले उल्लेख्य मुनाफा बढाएका छन् ।  

दोस्रो त्रैमाससम्म आइपुग्दा कर्जा पुनर्संरचनाको सुविधाले लघुवित्त संस्थाहरुको निष्क्रिय कर्जा अनुपात घट्न पुगेर खुद ब्याज आम्दानी बढ्दा अधिकांशको नाफा बढ्न पुगेको लघुवित्त बैंकर्स संघका अध्यक्ष रामबहादुर यादबले बताए ।  

पुष मसान्तसम्म आइपुग्दा अधिकांश लघुवित्त संस्थाहरुको खराब कर्जा अनुपात घट्न पुगेको छ । खराब कर्जा घट्दा संस्थाहरुको ब्याज आम्दानीमा सुधार देखिएर नाफा बढ्न पुगेको हो । राष्ट्र बैंकका अनुसार लघुवित्त संस्थाहरुले एनआरएफएस बमोजिम विवरण बनाउँदा उठ्न बाँकी रहेको ब्याजलाई समेत देखाउन मिल्ने भएकाले ब्याज आम्दानी र नाफामा सुधार देखिएको हो ।  

चालु आवको दोस्रो त्रैमाससम्म सबैभन्दा बढी नाफा साना किसान लघुवित्तले कमाएको छ । संस्थाले ५१ करोड ७७ लाख रुपैयाँ नाफा आर्जत गरी सर्वाधिक नाफा कमाउने संस्था बनेको छ । यो नाफा गत आवको सोही अवधिसम्मको तुलनामा १७.०१ प्रतिशत बढी हो ।  

त्यस्तै, छिमेक लघुवित्तले ५१ करोड १८ लाख, जीवन विकासले २० करोड ५४ लाख, ग्रामिण विकासले १८ करोड १८ लाख, डिप्रोक्सले २४ करोड ४५६ लाख र नेशनल लघुवित्तले २१ करोड ५२ लाख रुपैयाँ नाफा कमाएको छ ।  

गत आवको तुलनामा सर्वाधिक नाफा बढाउनेमा भने स्वाभिमान लघुवित्त रहेको छ । संस्थाले ३४९२ प्रतिशतले नाफा बृद्धि गरेको छ । यता महुली लघुवित्तको भने ६५.६९ प्रतिशतले नाफा घटेको छ ।  

दोस्रो त्रैमाससम्म नेष्डो समृद्धि लघुवित्त, नेरुडे मिर्मिरे, इन्फिनिटी लघुवित्त, समता घरेलु लघुवित्त, विन नेपाल लघुवित्त, सामुदायिक लघुवित्त र मातृभूमि लघुवित्त भने घाटामा रहेका छन् ।  

२५.२४ प्रतिशलते बढ्यो खुद ब्याज आम्दानी  

चालु आवको दोस्रो त्रैमाससम्म लघुवित्त संस्थाहरुको खुद ब्याज आम्दानी २५।२४ प्रतिशतले बढेको छ । सो अवधिसम्म ५० संस्थाले १४ अर्ब ८९ करोड रुपैयाँ ब्याज आम्दानी गरेका छन् ।  

गत आवको सोही अवधिसम्म भने संस्थाहरुले ११ अर्ब ८९ करोड रुपैयाँ ब्याज आम्दानी गरेका थिए ।  

दोस्रो त्रैमाससम्म ९ वटा संस्थाको मात्रै ब्याज आम्दानी घटेको छ भने बाँकी सबैको बृद्धि भएको छ ।  

सबैभन्दा ब्याज आम्दानी गर्नेमा डिप्रोक्स लघुवित्त रहेको छ । संस्थाले १ अर्ब ३५ करोड रुपैयाँ खुद ब्याज आम्दानी गरेको छ । यो रकम गत आवको सोही अवधिसम्मको तुलनामा ६८.९८ प्रतिशत बढी हो ।  

गत आवको तुलनामा सबैभन्दा बढी ब्याज आम्दानी बढ्नेमा भने धौलागिरी लघुवित्त रहेको छ । संस्थाको ब्याज आम्दानी २०६.८१ प्रतिशतले बढेको छ।  

इपीएसमा कुन अब्बल ?  

प्रतिसेयर आम्दानी (इपीएस)कम्पनीहरुको महत्वपूर्ण सूचक मानिन्छ । यो सूचकले कम्पनीको मुनाफा आर्जनको क्षमता देखाउने हुँदा कम्पनीको आधारभुत पक्षको विश्लेषणको प्रमुख सूचकको रुपमा लिइन्छ । करपछिको नाफालाई कुल सेयर संख्याले भाग गर्दा आउने प्रतिफललाई नै प्रतिसेयर आम्दानी भनिन्छ ।  

दोस्रो त्रैमाससम्म सबैभन्दा बढी इपीएस महिला लघुवित्तको रहेको छ । संस्थाको इपीएस ६७.३७ रुपैयाँ रहेको छ । त्यस्तै, मिथिला लघुवित्त र ग्लोबल आइएमई लघुवित्तको ३८.२४ रुपैयाँ, युनिक नेपालको ३६.९० रुपैयाँ, श्रृजनशील लघुवित्तको ३४.३० रुपैयाँ, सिवाइसी नेपालको ३२.४० रुपैयाँ र नेशनल लघुवित्तको ३२.३४ रुपैयाँ रहेको छ ।  

दोस्रो त्रैमाससम्म आइपुग्दा नेष्डो समृद्ध लघुवित्त, इन्फिनिटी, विन नेपाल, मातृभूमि, नेरुडे, समता घरेलु र समाज लघुवित्तको इपीएस भने ऋणात्मक अवस्थामा रहेको छ ।  

३० संस्थाको खराब कर्जा घट्यो  

लघुवित्त संस्थाहरुको नाफा बढ्नु प्रमुख कारण भनेकै खराब कर्जा घट्नु हो । दोस्रो त्रैमाससम्म आइपुग्दा ८० प्रतिशत संस्थाको खराब कर्जा घट्दा समग्रमा लघुवित्तहरुको नाफा बढ्न टेवा पुगेको हो ।  

सो अवधिसम्म आइपुग्दा २० संस्थाको खराब कर्जा अनुपात सामान्य बढेको छ भने ३० वटा संस्थाले यस्तो कर्जा घटाएका छन् । जसकारण लघुवित्तहरुको ब्याज आम्दानीमा सुधार देखिएर नाफा बढ्न पुगेको हो ।  

सबैभन्दा बढी श्रृजनशील लघुवित्तले गत आवको तुलनामा ११.१७ अंकले खराब कर्जा अनुपात घटाएर ६.९७ प्रतिशत कायम गर्न सफल भएको छ । त्यस्तै, सामुदायिक लघुवित्तले ९.७६ अंक, जनउत्थान सामुदायिक लघुवित्तले ४.३२ अंक, ग्रामिण विकास लघुवित्तले ३.६८ अंक र महिला लघुवित्तले ३.०९ अंकले खराब कर्जा घटाएको छ ।  

सो अवधिसम्म २३ वटा संस्थाको खराब कर्जा ५ प्रतिशत भन्दा कम छ भने २७ वटाको ५ प्रतिशत भन्दा माथि छ ।