वीरगञ्ज नाकाबाट चालु आवको ७ महिनामा १ खर्ब ४ अर्बबराबरको पेट्रोलियम पदार्थ आयात

काठमाण्डौ । वीरगञ्ज नाकाबाट चालु आर्थिक वर्षको ७ महिनामा १ खर्ब ४ अर्ब ७६ करोड रुपैयाँबराबरको पेट्रोलियम पदार्थ आयात भएको छ । यो अवधिमा यो नाफा हुँदै डिजेल, पेट्रोल, लिक्विफाइड पेट्रोलियम ग्यास (एलपिजी), एभिएसन टर्वाइन फ्युल (एटिएफ), मट्टितेल आयात भएको हो ।

यो रकम अघिल्लो आवको सोही अवधिको तुलनामा ८४ करोड बढी हो । चालु आर्थिक वर्षको पछिल्ला महिनामा पेट्रोलियम पदार्थको आयात र राजश्व दुवै वृद्धि भएको छ । चालु आर्थिक वर्षको ७ महिनामा ५१ अर्ब ७९ करोड रुपैयाँ बराबरको पाँच लाख ८१ सात सय ९९ किलोलिटर डिजेल आयातबाट २३ अर्ब १० करोड रुपैयाँ राजस्व संकलन भएको वीरगञ्ज भन्सार कार्यालयले जनाएको छ । सात महिनाको अवधिमा पेट्रोलियम पदार्थको आयातबाट ४३ अर्ब ११ करोड रुपैयाँ राजश्व संकलन भएको छ ।  

यो अवधिमा २२ अर्ब १४ करोड रुपैयाँ मूल्य बराबरको २ लाख ५५ हजार पाँच सय ४२ किलोलिटर पेट्रोल आयात हुँदा १४ अर्ब ४९ करोड रुपैयाँ राजश्व संकलन भएको छ ।

गत आर्थिक वर्षको सात महिनाको अवधिमा १ खर्ब तीन अर्ब ९२ करोड मूल्य बराबरको पेट्रोलियम पदार्थको आयात भएको थियो । गत आवको सोही अवधिमा सबैखालको पेट्रोलियम पदार्थको आयातबाट ३८ अर्ब ६५ करोड रुपैयाँ राजश्व संकलन भएको थियो ।