नेको इन्स्योरेन्सलाई हकप्रद बिकाउन हम्मे, एलआईसी नेपालको जस्तै लिलामीमा आउने सम्भावना बढी

काठमाण्डौ । नेको इन्स्योरेन्सलाई हकप्रद सेयर बिकाउन हम्मेहम्मे परेको छ । कम्पनीले गत फागुन ८ गतेदेखि हाल कायम चुक्तापूँजी २ अर्ब १ करोड २३ लाख रुपैयाँ बराबरको १ः०.२५ अनुपातमा १०० रुपैयाँ अंकित दरका कुल ५० लाख ३० हजार ९०१ कित्ता हकप्रद सेयर निष्कासन गरेको थियो ।  

कम्पनीले फागुन २८ गतेसम्मको म्याद राखेर बुकक्लोज अघि कायम सेयरधनीहरुका लागि हकप्रद निष्कासन गरेको थियो । तर तोकेको अवधिसम्म कम्पनीको हकप्रद आधा पनि बिक्री नभएपछि कम्पनीले आवेदन दिने म्याद थप गरेको छ ।  

कम्पनीले हकप्रद खरिदका लागि चैत १४ गतेसम्म आवेदन दिन सकिने जनाएको छ । म्याद थप गरेको पाँच दिनसम्म पनि कम्पनीको हकप्रदमा आवेदन दिनेको संख्या र माग कित्ता संख्या भने बढ्न सकिरहेको छैन ।  

सिडिएस एण्ड क्लियरिङ्गका अनुसार आजसम्म कम्पनीको हकप्रदमा २१ लाख २ हजार ९५१ कित्ताका लागि मात्रै आवेदन परेको छ, जुन यो कुल जारी गरिएको कित्ता संख्याको ४१.८० प्रतिशत मात्रै हो । सो अवधिसम्म २५ हजार १२८ जना आवेदकले २१ करोड २ लाख ९५ हजार १०० रुपैयाँ बराबरको हकप्रद भरेका छन् ।  

हुन त कम्पनीको हकप्रदमा आवेदन दिने समय अझैपनि ११ दिन बाँकी छ । तर बुकक्लोज अघि कायम सेयरधनीहरुमा कम्पनीको हकप्रदप्रति त्यति आकर्षण नरहेको स्पष्ट देखिएको छ । अझैपनि कम्पनीको ५८.२० प्रतिशत हकप्रद बिक्न बाँकी छ । यसर्थमा यो कम्पनीको हकप्रद पनि यसअघि जारी भएको लाइफ इन्स्योरेन्स कर्पोरेशन (नेपाल)को जस्तै लिलामीमा आउन सक्ने सम्भावना बढी रहेको छ ।  

एलआइसी नेपालले पनि तोकेको समयसम्म बिक्री खुल्ला गरेको हकप्रद सेयर पूर्ण नबिकेपछि लिलामीमार्फत सेयर बिक्री गरेको थियो ।