सेयरबजारमा दुई पुनर्बीमकको अत्यधिक चर्चा, आधारभूत पक्षमा कुन कति बलियो ?

काठमाण्डौ । पछिल्लो समय धितोपत्र दोस्रो बजारमा दुई पुर्बीमा कम्पनीको निकै चर्चा छ । बजारमा नेपाल रि इन्स्योरेन्स र हिमालयन रि इन्स्योरेन्सको हकप्रद आउने प्रचारले लगानीकर्ताहरु यी दुई कम्पनीको सेयरमा निकै आकर्षित देखिएका छन् ।  

केही समययता दोस्रो बजारमा दुई पुनर्बीमा कम्पनीको सेयर सर्वाधिक कारोबार समेत हुँदै आइरहेको छ । अहिले लगानीकर्ताहरुबीच यी दुई रि इन्स्योरेन्सको सेयरको चर्चा चलिरहँदा केही सेयर खेलाडीहरुले भने त्यसकै मौका छोपेर सेयर चलखेल समेत गरिरहेका छन् ।

डेढ महिनाअघिसम्म हजार रुपैयाँभन्दा तल रहेको यी दुई कम्पनीको सेयरभाउ यतिबेला हजार रुपैयाँभन्दा माथि छ । पछिल्लो समय बजारमा जुन कम्पनीको बढी चर्चा हुन्छ, त्यसकै पछि लाग्ने प्रवृत्ति हाबी छ, जसकारण सोझा लगानीकर्ताहरु त्यस्ता कम्पनीको सेयरमा लगानी गरेर फसेका छन् ।  

यतिबेला बजारमा हिमालयन र नेपाल रि इन्स्योरेन्सको पनि निकै चर्चा छ । लगानीकर्ताहरुले अहिले यी दुई कम्पनीलाई ‘हट केक’को संज्ञा दिइरहेका छन् । तर चर्चाकै आधारमा लगानी गरिहाल्दा डुब्ने सम्भावना बढी रहन्छ ।  

हुन त केही लगानीकर्ताहरुले यी दुई कम्पनी फन्डामेन्टल रुपमा समेत बलियो भएको बताइरहेका छन् । बजारमा चलखेल भएका केही फाइनान्स कम्पनीहरुको तुलनामा दुई पुनर्बीमा कम्पनी आधारभूत पक्षबाट बलिया नै भएको लगानीकर्ताहरुको भनाई छ ।  

बजारमा केही लगानीकर्ताहरु भने दुई पुनर्बीमा कम्पनीमध्ये कुन चाहिँ धेरै बलियो भनेर आफ्नै हिसाबले तुलना समेत गरिरहेका छन् । दुई कम्पनी नै एउटै सेक्टरको भएकाले यी दुई कम्पनीको व्यवसायको अवस्था र आर्जित मुनाफाको अवस्था लगभग एउटै देखिन्छ । तरपनि नेपाल पुनर्बीमा कम्पपनी अगाडी नै सञ्चालनमा आएकाले व्यवसाय र कोषहरुको आधारमा हिमाालयन रि भन्दा केही बलियो देखिएको छ ।  

यी दुई कम्पनीमध्ये जुनकुनैमा लगानी गर्नुअघि लगानीकर्ताले कम्पनीको आधारभूत पक्षहरुको बारेमा अध्ययन गर्नुपर्ने हुन्छ । हचुवाको भरमा अर्थात् बजारमा चर्चा चलकै आधारमा लगानी गर्दा फसिने वा लगानी डुब्ने सम्भावना उच्च रहन्छ ।  

नेपाल रि इन्स्योरेन्सले गत आवको चौथो त्रैमासिक वित्तीय रिर्पोट बल्ल सार्वजनिक गरेको छ भने हिमालयन रि इन्स्योरेन्सले चालु आवको दोस्रो त्रैमाससम्मको विवरण प्रकाशित गरिसकेको छ । यसआधारमा पनि नेपाल रि भन्दा हिमालयन रि इन्स्योरेन्स वित्तीय सुशासनमा राम्रो मान्न सकिन्छ ।  

गत आवको चौथो त्रैमासिक वित्तीय विवरणको आधारमा यी दुई पुनर्बीमा कम्पनीलाई विभिन्न सूचकमा तुलनामा गरिएको छ । जसमा अधिकांश सूचकमा नेपाल रि राम्रो देखिएको छ भने आधारभुत पक्षमा चाहिने सूचकहरु प्रफिट, इपीएस, नेटवर्थ, पीई रेसियोमा भने हिमालयन रि राम्रो देखिएको छ, जुन सेयर लगानीकर्ताहरुका लागि बढी महत्वपूर्ण सूचकहरु मानिन्छ ।  

तर दीर्घकालिन लगानीका लागि हेर्ने हो भने यी दुबै कम्पनी नै राम्रो मान्न सकिन्छ । अझ तुलनात्मक रुपमा नै हेर्ने हो भने नेपाल रि उत्कृष्ट मान्न सकिन्छ । कम्पनीको व्यवसाय र कोषहरुमा संकलित रकमको आधारमा नेपाल रिको लगानी कम जोखिम मान्न सकिन्छ ।  

नोटः गत आवको चौथो त्रैमासिक रिर्पोटको आधारमा दुई पुनर्बीमा कम्पनीलाई तुलना गरिएको मात्र हो । दुईमध्ये कुनैपनि कम्पनीको धितोपत्र खरिदका लागि सिफारिस गरिएको भने होइन । लगानीकर्ताहरु आफैंले विश्लेषण गरी सेयर खरिद गनुपर्नेछ ।