मंगलबारको प्रदर्शन शान्तिपूर्ण हुन्छ, सम्पूर्ण तयारी पूराः राप्रपा

काठमाण्डौ । राष्ट्रिय प्रजातन्त्र पार्टी(राप्रपा)ले मंगलबार काठमाण्डौमा आयोजना गर्ने प्रदर्शन र सभाको सम्पूर्ण तयारी पूरा भएको जनाएको छ । राप्रपाले संवैधानिक राजतन्त्र र हिन्दु राज्य पुनर्स्थापनाका लागि दबाब दिन मंगलबार काठमाण्डौको भृकुटीमण्डपमा प्रदर्शन र सभा आयोजना गर्दैछ ।  

उक्त सभामा पार्टी अध्यक्ष राजेन्द्र लिङ्देन लगायतका पार्टीका नेताहरुले सम्बोधन गर्ने कार्यक्रम रहेको छ । प्रदर्शन र सभालाई शान्तिपूर्ण  हुने राप्रपाले जनाएको छ । सभा सुरु हुनुअघि काठमाण्डौका सुन्धारा, रत्नपार्क लगायतका स्थानबाट जुलुस निकालिने छ । उक्त जुलुस भृकुटीमण्डपमा पुगेर सभामा परिणत हुनेछ ।

यसअघि गत चैत १५ गते काठमाण्डौको तिनकुनेमा हिन्दु राज्य पुनर्स्थापनाको माग गर्दै प्रदर्शन भएको थियो । जसमा  राप्रपाको समेत समर्थन र सहभागिता रहेको थियो । दुर्गा प्रसाईंले नेतृत्वको उक्त प्रदर्शनमा  तोडफोड तथा आगजनी हुनुका साथै २ जनाको मृत्यु भएको थियो । उक्त प्रदर्शनको विषयमा राप्रपाका नेता रविन्द्र मिश्र र धवल शमशेर जबरा लगाएका नेता पक्राउ परेका छन् ।