लघुबीमा कम्पनीहरुको ९१% रकम मुद्दती निक्षेपमा थुप्रियो, घट्दो ब्याजदरले आम्दानी घट्न सक्ने

काठमाण्डौ । लघुबीमा कम्पनीहरुले विभिन्न क्षेत्रमा गरेको लगानी २६.०५ प्रतिशतले बढाएका छन् । नेपाल बीमा प्राधिकरणका अनुसार चालु आवको तेस्रो त्रैमाससम्म ७ लघुबीमा कम्पनीले विभिन्न क्षेत्रमा ४ अर्ब ४३ करोड १३ लाख रुपैयाँ लगानी गरेका छन् ।  

यो रकम गत आवको सोही अवधिसम्मको तुलनामा २६ प्रतिशत बढी हो । गत आवको तेस्रो त्रैमाससम्म लघुबीमा कम्पनीहरुले विभिन्न क्षेत्रमा ३ अर्ब ५१ करोड रुपैयाँ लगानी गरेका थिए ।  

लघुबीमा कम्पनीहरुको ९१.१८ प्रतिशत रकम बैंक तथा वित्तीय संस्थाहरुको मुद्दती निक्षेपमा रहेको छ । चालु आवको तेस्रो त्रैमाससम्म लघुबीमकहरुको मुद्दती निक्षेपमा कुल ४ अर्ब ४ करोड रुपैयाँ रहेको छ । यो रकम गत आवको तुलनामा १५.१८ प्रतिशत बढी हो ।  

गत आवको तेस्रो त्रैमाससम्म बैंक तथा वित्तीय संस्थाको मुद्दती निक्षेपमा लघुबीमकहरुको ३ अर्ब ५० करोड ८१ लाख रुपैयाँ लगानी रहेको थियो ।  

नेपाल बीमा प्राधिकरणले लगानी विविधिकरण गर्न निर्देशन दिएपनि लघुबीमा कम्पनीहरु भने बैंकको मुद्दती निक्षेपमा नै बढी केन्द्रीत देखिएका छन् । पछिल्लो समय बैंकहरुको मुद्दती निक्षेपको ब्याजदर घट्दो अवस्थमा छ । कुल लगानीको ९१ प्रतिशत रकम बैंकमा सीमित राख्दा लघुबीमकहरुको आम्दानीमा संकुचन आउने देखिन्छ ।  

प्राधिकरणले अन्य सेक्टरको अध्ययन गरेर लगानी विविधिकरण गर्न बारम्बार भनेपनि लघुबीमा कम्पनीहरुले अन्य क्षेत्रमा लगानी गर्न वा बढाउन सकिरहेका छैनन् । यसले लघुबीमकहरुको नाफा उल्लेख्य बढ्न नसक्ने अवस्था आउने देखिन्छ ।  

चालु आवको तेस्रो त्रैमाससम्म आधा जसो लघुबीमकहरुको नाफा ह्वात्तै घटेको छ, जसमा निर्जीवन लघुबीमकहरु रहेका छन् । गत आवको तुलनामा नेपाल माइक्रो इन्स्योरेन्सको नाफा ८०।०८ प्रतिशत, स्टार माइक्रोको ८९.१० प्रतिशत र ट्रस्ट माइक्रो इन्स्योरेन्सको नाफा ६७।५८ प्रतिशतले घटेको छ भने जीवन लघुबीमकहरुको मुनाफमा उल्लेख्य सुधार देखिएको छ ।  

तेस्रो त्रैमाससम्म लघुबीमकहरुले वाणिज्य बैंकको मुद्दतीमा ३ अर्ब ७६ करोड रुपैयाँ लगानी गरेका छन् । त्यस्तै, विकास बैंकको मुद्दतीमा २२ करोड ४१ लाख र ग वर्गको वित्तीय संस्थाहरुमा ५ करोड ३० लाख रुपैयाँ लगानी रहेको छ । वाणिज्य बैंकको मुद्दतीको निक्षेप ८.४७ प्रतिशत, विकास बैंकको ७३० प्रतिशत र फाइनान्सहरुको मुद्दतीको निक्षेप ३६१.११ प्रतिशतले बृद्धि भएको छ ।  

लगानी निर्देशिका बमोजिम लघुबीमकहरुले वाणिज्य बैंकको मुद्दतीमा कुल लगानीको १५ प्रतिशत रकम लगानी गर्न पाउने व्यवस्था छ । त्यस्तै, विकास बैंकहरुको मुद्दतीमा १० प्रतिशत र ग वर्गको वित्तीय संस्थाको मुद्दतीमा ५ प्रतिशत रकम लगानी गर्न पाउने व्यवस्था छ ।  

पोहोर शुन्य लगानी रहेको सूचीकृत पब्लिक कम्पनीको सेयरमा लगानी भने यो वर्ष लघुबीमकहरुले ३४ करोड ५९ लाख रुपैयाँ लगानी गरेका छन् । यस वर्ष सबै लघुबीमकले सेयरबजारमा लगानी गर्न हात हालेका छन् । लघुबीमा कम्पनीहरुले कुल लगानीको १० प्रतिशत रकम सेयरबजारमा लगानी गर्न पाउने व्यवस्था छ ।  

त्यस्तै, अग्राधिकार सेयर, बण्ड, डिबेञ्चर र ऋणपत्रमा १ करोड ४७ लाख, सूचीकृत पब्लिक कम्पनीको बण्ड, डिबेञ्र र ऋणपत्रमा १ करोड ८ लाख रुपैयाँ र नागरिक लगानी कोष र म्युचुअल फण्डमा १ करोड ९० लाख रुपैयाँ लगानी गरेका छन् ।  

लघुबीमा कम्पनीहरुले एउटै सेक्टरमा मात्रै लगानी थुपार्दा मुनाफा प्रभावित बन्न सक्ने देखिन्छ । बैंक तथा वित्तीय संस्थाहरुको मुद्दती निक्षेको ब्याजदर घट्दो अवस्थामा छ, तर लघुबीमकहरुको ९१ प्रतिशत रकम मुद्दती निक्षेपमै थुप्रिदा आम्दानी उल्लेख्य नबढ्ने देखिन्छ ।