नर्थ समिट हाइड्रोले आईपीओ निष्कासन गर्ने, बिक्री प्रबन्धकमा माछापुच्छ्रे क्यापिटल

काठमाण्डौ । नर्थ समिट हाइड्रो लिमिटेडले आईपीओ निष्कासन गर्ने भएको छ । कम्पनीले जारी पुँजीको ३० प्रतिशत अर्थात ३८ करोड ४० लाख रुपैयाँबराबरको रु. १०० अंकित दरका कुल ३८ लाख ४० हजार आईपीओ सर्वसाधारणमा जारी गर्ने योजना बनाएको छ ।  

यसका लागि कम्पनी र माछापुच्छ्रे क्यापिटल लिमिटेबीच संस्थागत परामर्श सेवाका साथै निष्काशन तथा बिक्री प्रबन्ध सेवा प्रदान गर्न सम्झौता सम्पन्न भएको छ । उक्त सम्झौता जेठ २३ गते सम्पन्न भएको हो ।

सम्झौता समारोहमा धितोपत्र निष्कासन तथा बिक्री प्रबन्धक माछापुच्छ्रे क्यापिटलको तर्फबाट प्रमुख कार्यकारी अधिकृत उपेन्द्र मालाकार र नर्थ समिट हाइड्रोको तर्फबाट प्रबन्ध सञ्चालक बालेन्द्र क्षेत्रीले हस्ताक्षर गरेका छन् ।  

नर्थ समिट हाइड्रो लिमिटेडले लमजुङ जिल्लाको मस्र्याङदी गाउँपालिका भएर बग्ने न्यादी र फिदीखोलाको पानीको बहाव सदुपयोग गरी २१.४ मेवा क्षमताको न्यादी फिदी जलविद्युत आयोजना निर्माण गरिरहेको छ ।