उधारो सेयर कारोबार बन्द बारे बोले सेबोन अध्यक्ष, भन्छन्-'यो तत्काल कार्यान्वयन हुँदैन, लङटर्मका लागि हो'

काठमाण्डौ । नेपाल धितोपत्र बोर्ड(सेबोन)ले आर्थिक बर्ष ०८२/८३ को नीति तथा कार्यक्रममार्फत दोस्रो बजारमा धितोपत्र खरिद गर्दा खरिदकर्ताको बैंक खातामा रकम भएपश्चात मात्रै कारोबार हुने ब्यवस्था गर्ने मंगलबार घोषणा गर्यो ।  

बोर्डको वार्षिक नीति तथा कार्यक्रममा समेटिएको यो विषयले बजार तरगिंत देखिएको छ । यो नीतिका विषयमा बजारका लगानीकर्तादेखि विज्ञसम्म विभाजित देखिएका छन् । 

यो व्यवस्था कार्यान्वयन भएको अवस्थामा लगानीकर्ताको बैंक खाता र डिम्याट खाता इन्टिग्रेसन गरेर पैसा भए/नभएको यकिनपछि मात्रै सेयर कारोबार सम्भव हुन्छ । तर, के यो व्यवस्था तत्कालै कार्यान्वयन हुने अवस्था हो ? धितोपत्र बोर्डले के उद्देश्यले यो व्यवस्थालाई आफ्नो नीति तथा कार्यक्रममा समेटेको हो त ?  

नीति तथा कार्यक्रममा आएको र धेरै लगानीकर्ताको चासो बनेको यो विषयलाई धितोपत्र बोर्डका अध्यक्ष सन्तोषनारायण श्रेष्ठले थप प्रष्ट पारेका छन् ।  

बुधबार साँझ बिजशालासँग कुरा गर्दै अध्यक्ष श्रेष्ठले उधारो कारोबार बन्द गर्ने भनी घोषणा गरिएको यो व्यवस्था तत्काल लागू नहुने प्रष्ट पारे । 'यो नीति लङटर्मका लागि हो । बजारलाई दिगो र बलियो बनाउनका लागि अलिक पछि मात्र यो व्यवस्था कार्यान्वयनमा जाने वातावरण बन्ला ।' उनले भने-'तर बजारमा हल्ला चलेजस्तो नीति तथा कार्यक्रममा आउनेबित्तिकै यो व्यवस्था तत्कालैबाट कार्यान्वयनमा जाने होइन । यही विषयका कारण लगानीकर्ता प्यानिक बनिरहनुपर्ने म कुनै कारण देख्दिँन।'

उनले यो व्यवस्था नीति तथा कार्यक्रममा आएकै विषय  भएको, बजारलाई दिगो र बलियो बनाउनका लागि पछि उपयुक्त माध्यम हुनसक्छ भन्ने सोंचको रुपमा मात्र समेटिएको उल्लेख गर्दै भने-'नीति तथा कार्यक्रममा आउनेबित्तिकै सबै कुरा लागू भइहाल्छ भन्ने पनि होइन । घोषित कार्यक्रमहरु आवश्यकताअनुसार लागू हुँदै जाने हो ।'  

उनले बजार सुदृढ बनाउनका लागि दीर्घकालमा भने यो व्यवस्थातर्फ जानैपर्ने आवश्यकता समेत औंल्याए । 'पूर्ण रुपमा मार्जिन लेण्डिङमा गइसकेपछि त यो व्यवस्था कार्यान्वयन गर्नैपर्छ । ब्रोकरहरुको सुरक्षाका लागि समेत यसतर्फ उन्मुख हुनुपर्छ ।' उनले थपे-'लगानीकर्ताको नाममा सबै कुरालाई लुज छाड्न सकिन्न ।'