तीन कम्पनीले आईपीओ निष्कासनको अनुमति माग्दै बोर्डमा दिए निवेदन, कुनले कति ?

काठमाण्डौ । थप तीन कम्पनीले आइपीओ निष्कासनको अनुमति माग्दै नेपाल धितोपत्र बोर्ड (सेबोन)मा निवेदन दिएका छन् ।

उत्पादन तथा प्रशोधन समूहबाट दुई कम्पनी र एक होटल गरी तीन कम्पनीले बोर्डसँग आइपीओ निष्कासनको अनुमति मागेको हो ।

होटल इच्छा लिमिटेडले अंकित मूल्य १०० रुपैयाँ दरमा ३५ करोड रुपैयाँ बराबरको ३५ लाख कित्ता आइपीओ निष्कासनको अनुमति मागेको हो । कम्पनीले माघ २० गते बोर्डमा निवेदन दिएको थियो । यो कम्पनीको बिक्री प्रबन्धकमा हिमालयन क्यापिटल लिमिटेड रहेको छ ।

त्यस्तै, एशियन ब्याट्रिज लिमिटेडले पनि अंकित मूल्य १०० रुपैयाँ दरमै १३ करोड रुपैयाँ बराबरको १३ लाख कित्ता आइपीओ निष्कासनको अनुमति मागेको छ । कम्पनीले गत माघ २० गते नै बोर्डमा निवेदन दिएको थियो । यो कम्पनीको बिक्री प्रबन्धकमा पनि हिमालयन क्यापिटल नै रहेको छ ।

यसका साथै बोर्डसँग आइपीओ निष्कासनको अनुमति माग्ने अर्को कम्पनीमा हुलास आइरन इन्डस्ट्रिज लिमिटेड रहेको छ । यो कम्पनीले भने प्रिमियम मूल्यमा आइपीओ जारी गर्न बोर्डसँग अनुमति मागेको हो ।

कम्पनीले १०० रुपैयाँ अंकित मूल्यमा १५५ रुपैयाँ थप गरी प्रतिकित्ता २५५ रुपैयाँका दरले २ अर्ब ४८ करोड ६२ लाख ५० हजार रुपैयाँ बराबरको ९७ लाख ५० हजार कित्ता आइपीओ निष्कासन गर्न बोर्डसँग अुनमति मागेको छ । यो कम्पनीले पनि माघ २० मै निवेदन दिएको थियो । धितोपत्र निष्कासन तथा बिक्री प्रबन्धकमा भने कुमारी क्यापिटल लिमिटेड रहेको छ ।