निर्वाचनमा कस्तो रहनेछ मौसमको अवस्था ?

काठमाण्डौ । जल तथा मौसम विज्ञान विभाग अन्तर्गतको मौसम पूर्वानुमान महाशाखाले फागुन २० देखि २२ गतेसम्म उल्लेखनीय मौसम प्रणालीको प्रभाव नरहने जनाएको छ।

महाशाखाले बुधबार जारी गरेको निर्वाचन विशेष मौसम बुलेटिन अनुसार, बुधबार कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा फाटफुट वर्षा र हिमपातको सम्भावना छ। तर, यी प्रदेशको तराई क्षेत्रमा मौसम मुख्यतया सफा रहनेछ।

फागुन २१ गते बिहीबार कोशी, मधेस र गण्डकी प्रदेशको तराई भूभागमा मौसम सामान्यतया सफा रहने महाशाखाले जनाएको छ। सोही दिन कोशी, बागमती र गण्डकी प्रदेशका हिमाली तथा पहाडी भूभागमा आंशिक बादल लाग्ने अनुमान छ।

फागुन २२ गते शुक्रबार मधेस प्रदेश बाहेक अन्य ६ वटा प्रदेशका हिमाली तथा पहाडी भूभागमा एक–दुई स्थानमा हल्का वर्षा र हिमपात हुने सम्भावना रहेको छ। मधेस प्रदेशमा मौसम मुख्यतया सफा रहने छ।

महाशाखाले जनाएका अनुसार, आगामी तीन दिनमा देशभर सामान्य मौसम रहने र ठूलो वर्षा वा हिमपात हुने सम्भावना न्यून रहेको छ।