जीवन बीमा कम्पनीहरुले संकलन गरे रु.१.२४ खर्ब प्रिमियम, सबैको व्यवसायमा ग्रोथ

काठमाण्डौ । जीवन बीमा कम्पनीहरुको व्यवसाय १४.७३ प्रतिशतले वृद्धि भएको छ । नेपाल बीमा प्राधिकरणका अनुसार १४ जीवन बीमा कम्पनीले चालु आवको ८ महिनासम्ममा १ खर्ब २४ अर्ब ७२ करोड ५८ लाख रुपैयाँ प्रिमिमय संकलन गरेका छन् ।  

यो प्रिमियम गत आवको सोही अवधिसम्मको तुलनामा १६ अर्ब बढी हो । गत आवको फागुन मसान्तसम्म जीवन बीमा कम्पनीहरुले १ खर्ब ८ अर्ब ७१ करोड रुपैयाँ बीमाशुल्क आर्जन गरेका थिए ।  

सो अवधिसम्म आइपुग्दा सबै बीमकहरुको व्यवसायमा उल्लेख्य वृद्धि देखिएको छ । फागुन महिनासम्म सबैभन्दा बढी प्रिमियम संकलन गर्नेमा नेपाल लाइफ इन्स्योरेन्स रहेको छ । कम्पनीले ३२ अर्ब ९७ करोड ५७ लाख रुपैयाँ प्रिमियम संकलन गरेको छ । यो प्रिमियम रकम जीवन बीमकहरुको कुल व्यवसायको २६.४४ प्रतिशत हिस्सा हो ।  

नेपाल लाइफको व्यवसाय गत आवको तुलनामा १२.४७ प्रतिशत वृद्धि भएको छ । गत आवको सोही अवधिसम्म कम्पनीले २९ अर्ब ३९ करोड ८९ लाख रुपैयाँ बीमाशुल्क संकलन गरेको थियो ।  

त्यस्तै, नेशनल लाइफले १५ अर्ब २१ लाख रुपैयाँ प्रिमियम संकलन गर्दा लाइफ इन्स्योरेन्स कर्पोरेशन नेपालले १३ अर्ब ४६ करोड ३ लाख रुपैयाँ प्रिमियम संकलन गरेको छ ।  

यसका साथै हिमालयन लाइफले ११ अर्ब ७१ करोड ६२ लाख, राष्ट्रिय जीवन बीमा कम्पनीले ८ अर्ब ७४ करोड ३० लाख, सूर्यज्योति लाइफले ७ अर्ब ४३ करोड ८७ लाख, एशियन लाइफले ६ अर्ब ३८ करोड ४८ लाख, सिटिजन लाइफले ५ अर्ब ३२ करोड ५८ लाख, सानिमा रिलायन्स लाइफले ४ अर्ब ७६ करोड २८ लाख, आइएमई लाइफले ४ अर्ब २८ करोड ५५ लाख, मेट लाइफले ४ अर्ब २५ करोड १६ लाख, रिलायबल नेपाल लाइफले ३ अर्ब ९० करोड ९१ लाख, प्रभु महालक्ष्मी लाइफले ३ अर्ब ६६ करोड ७७ लाख रुपैयाँ र सन नेपाल लाइफले २ अर्ब ८० करोड २० लाख रुपैयाँ प्रिमिमय संकलन गरेका छन् ।  

गत आवको तुलनामा सर्वाधिक व्यवसाय ग्रोथ गर्नेमा भने राष्ट्रिय जीवन बीमा कम्पनी रहेको छ । यो कम्पनीले ९५.१९ प्रतिशतले व्यवसाय ग्रोथ गरेको छ ।