(2).gif)
.jpg)
.png)
काठमाण्डौ । सेयर बजारका अंकहरू स्क्रिनमा झर्दै थिए, तर ती अंकहरू केवल संख्या मात्र थिएनन्-त्यो हजारौं लगानीकर्ताको मनोबल, आशा र चिन्ताको प्रतिबिम्ब थियो।
हरेक आइतबारझैं आज पनि हाम्रो नियमित स्तम्भ “ग्राउण्ड जिरो” मार्फत हामी ब्रोकर हाउसको वास्तविक दृश्य नियाल्न निस्कियौं,जहाँ बजारको वास्तविक मनोविज्ञान बस्छ।
अनामनगर र घट्टेकुलोका ब्रोकर हाउस पुग्दा एउटा साझा दृश्य भेटियो: भीड उस्तै, तर आत्मविश्वास कमजोर। स्क्रिन अगाडि उभिएका अनुहारहरूमा अपेक्षा भन्दा बढी चिन्ता देखिन्थ्यो।
इम्पेरियल सेक्युरिटिजः भीड छ, तर भरोसा हराउँदै
अनामनगरस्थित इम्पेरियल सेक्युरिटिज (ब्रोकर नं. ४५) मा लगानीकर्ताको बाक्लो उपस्थिति थियो। तर बजार ४५ अंकभन्दा बढीले घट्न थालेपछि वातावरण बदलिन थाल्यो।
“नयाँ सरकार आयो भने बजार सुध्रिन्छ भन्ने लागेको थियो,” एक लगानीकर्ताले गुनासो पोखे, “तर उल्टै झन् ओरालो लाग्न थाल्यो। बजारले यस्तो बानी बसालिसक्यो,भोलि बढ्ला भन्ने आशामा फेरि किन्न मन लाग्ने।”
त्यसैबीच अर्को आवाज आयो: “सेयर बजार पनि रक्सी जस्तै हो, जति छिर्यो उति बाहिर निस्कन गाह्रो हुन्छ।”
यहाँ लगानी केवल पैसा होइन, मनोवैज्ञानिक बन्धन पनि देखिन्थ्यो।
आर्यतारा सेक्युरिटिजः ‘सय अंक झर्ने दिन’ को डर वास्तविक बन्यो
आर्यतारा इन्भेष्टमेन्ट (ब्रोकर नं. ५७) पुग्दा लगानीकर्ताहरूको बहस अझ तीव्र थियो।
“आज त बजार सेन्चुरी हान्छ जस्तो छ,” एक महिला लगानीकर्ताले चिन्ता व्यक्त गरिन्, “सरकारले केही राम्रो गर्ला भन्ने आशा थियो, तर उल्टै मेरो पोर्टफोलियो नै डुब्न थालेको छ।”
अर्की महिलाले बजारको गिरावटलाई फरक ढंगले व्याख्या गरिन्: “ठूला लगानीकर्ता पक्राउ हुन थालेपछि साना लगानीकर्ता डराएर भागिरहेका छन्, त्यसैले बजार यसरी झरेको हो।”
केही दूरीमा बसेका लगानीकर्ताहरू भने नीतिगत प्रश्न उठाइरहेका थिए: “कारबाही गर्नु ठीक हो, तर यसको असर पूँजीबजारमा पर्ने कुरा सरकारले किन सोच्दैन?”
त्यतिन्जेल स्क्रिनमा अंक झर्दै गए, १०० अंकको गिरावट।
एक लगानीकर्ताले आफ्नो मोबाइल हेर्दै भनिन्: “मैले भनेकै थिएँ, आज सय अंक झर्छ भनेर… मेरो मात्रै ५ लाख गुमिसक्यो।”
भिजन सेक्युरिटिजः डर, राजनीति र विश्व अर्थतन्त्रको असर
घट्टेकुलोस्थित भिजन सेक्युरिटिज (ब्रोकर नं. ३४) मा बहस अझ फराकिलो थियो, यहाँ बजार मात्र होइन, राजनीति र विश्व घटनाक्रम पनि छलफलमा थिए।
“ठूला व्यवसायीहरूलाई पक्राउ गर्दा उनीहरूको कारोबार रोकिन्छ, त्यसको सिधा असर बजारमा पर्छ,” एक लगानीकर्ताले चिन्ता व्यक्त गरे।
“यदि यसरी नै क्रम चल्यो भने पूँजीबजार चलायमान कसरी हुन्छ?”
अर्का लगानीकर्ताले अन्तर्राष्ट्रिय प्रभाव औंल्याए: “अमेरिका-इरान तनावले तेल बजार हल्लिएको छ, त्यसको असर हाम्रो बजारमा पनि परेको छ।”
तेल मूल्य वृद्धि, आर्थिक दबाब र सरकारी निर्णय: सबै मिलेर बजारलाई तानिरहेको अनुभूति त्यहाँ स्पष्ट थियो।
अंकभन्दा गहिरो छ बजारको मनोविज्ञान
आजको ग्राउण्ड जिरोले देखायो: बजार घट्नु केवल आर्थिक घटना होइन, यो विश्वासको संकट हो।
ब्रोकर हाउसहरूमा भीड अझै छ, तर आत्मविश्वास घट्दो छ।
लगानीकर्ताहरू बजारबाट बाहिरिएका छैनन्त, र उनीहरू डर, आशा र अन्योलबीच अड्किएका छन्।
प्रश्न अब अंकको मात्र होइन. विश्वास कहिले बढ्छ भन्ने हो।
.png)
.png)
