(1).gif)
(2).gif)
.png)
काठमाण्डौं । हुम्ला र बाजुराबीचको सीमा विवादले उग्र रूप लिएपछि पिलु–धुलिचौर हुँदै हुम्ला जोड्ने सडकखण्ड लगातार दोस्रो दिन पनि ठप्प छ ।
बाजुराको हिमाली गाउँपालिका अन्तर्गत धुलिचौर क्षेत्रमा स्थानीयवासीले सडक अवरुद्ध गरेपछि हुम्ला आवतजावत पूर्ण रूपमा प्रभावित भएको हो ।
(2).gif)
.gif)
(1).gif)
सडक बन्दका कारण धुलिचौर क्षेत्रमा दर्जनौँ मालवाहक तथा यात्रुवाहक सवारीसाधन रोकिएका छन् ।
स्थानीय प्रशासनका अनुसार करिब ३० देखि ४० वटा गाडी सडकमै थन्किएका छन् भने करिब १५० यात्रु अलपत्र परेका छन् ।
खाद्यान्न, निर्माण सामग्री, दैनिक उपभोग्य वस्तु र अन्य आवश्यक सामान बोकेका सवारीसाधन रोकिँदा आपूर्ति प्रणालीमा समेत असर पर्न थालेको छ ।
विवादको मूल कारण हिमाली गाउँपालिका–३ स्थित लाम्पाटा क्षेत्रमा प्रस्तावित प्रहरी चौकी निर्माणलाई मानिएको छ ।
उक्त क्षेत्रमा प्रहरी चौकी स्थापना गर्ने विषयमा बाजुराको लाम्पाटा र हुम्लाको खार्पुनाथ गाउँपालिका–२ थालीका स्थानीयबीच लामो समयदेखि असहमति रहँदै आएको थियो ।
यही विषयलाई लिएर दुई पक्षबीच तनाव बढ्दै जाँदा जेठ ५ गते झडपको अवस्था सिर्जना भएको हो ।
झडपका क्रममा बाजुरातर्फका ६ जना घाइते भएका थिए । घाइतेमध्ये चार जनाको अवस्था गम्भीर भएपछि उनीहरूलाई थप उपचारका लागि सुर्खेत पठाइएको छ ।
बाँकी घाइतेको उपचार स्थानीय स्वास्थ्य संस्थामा भइरहेको जनाइएको छ ।
घटनापछि बाजुराका स्थानीय आक्रोशित बनेका छन् । उनीहरूले आफूहरूमाथि आक्रमण गर्ने व्यक्तिलाई पक्राउ गरी कानूनी कारबाही नगरिएसम्म सडक सञ्चालन हुन नदिने अडान लिएका छन् ।
स्थानीयले दोषीमाथि तत्काल कारबाही नभए आन्दोलन अझ सशक्त बनाउने चेतावनी समेत दिएका छन् ।
.gif)
(1).gif)
विवाद समाधानका लागि बिहीबार बाजुराको सदरमुकाम मार्तडीमा सर्वपक्षीय बैठक बसेको थियो ।
बैठकमा राजनीतिक दल, सुरक्षा निकाय, स्थानीय तहका प्रतिनिधि तथा प्रशासनका अधिकारी सहभागी भएका थिए ।
बैठकले घटनाको निष्पक्ष छानबिन गर्न केन्द्रीय सरकारसमक्ष आयोग गठनको माग गर्ने तथा दोषीमाथि कारबाहीका लागि हुम्ला प्रशासनसँग समन्वय गर्ने निर्णय गरेको थियो ।
यद्यपि स्थानीयवासीले उक्त निर्णयप्रति असन्तुष्टि जनाएका छन् ।
उनीहरूले बैठकको सहमति व्यवहारमा कार्यान्वयन नभएसम्म सडक नखोल्ने स्पष्ट पारेका छन् ।
स्थानीयको दबाबका कारण प्रशासनले सडक खुलाउने प्रयास गरे पनि अवस्था सामान्य बन्न सकेको छैन ।
दुवै जिल्लाका प्रशासनिक निकायबीच वार्ता र समन्वय जारी रहे पनि स्थानीय तहमा अविश्वास बढेकाले समस्या तत्काल समाधान हुने संकेत देखिएको छैन ।
सडक अवरोध लम्बिँदै जाँदा हुम्ला र बाजुराको जनजीवन, व्यापारिक गतिविधि तथा यातायात सेवा थप प्रभावित बन्ने चिन्ता बढेको छ ।
सीमा विवाद र प्रहरी चौकी निर्माणजस्ता विषयलाई लिएर दुर्गम जिल्लाहरूमा समय–समयमा तनाव सिर्जना हुँदै आएको भएपनि यसपटकको घटनाले स्थानीय सुरक्षा, प्रशासनिक समन्वय र सीमांकन व्यवस्थापनमाथि गम्भीर प्रश्न उठाएको सरोकारवालाहरूले बताएका छन् ।
.png)
