चित्लाङ यात्रा गर्नेहरूलाई सास्ती, सडक १४ दिन पूर्ण बन्द

काठमाण्डौं । थानकोट–चन्द्रागिरि–चित्लाङ सडकखण्ड दुई साताका लागि बन्द हुने भएपछि काठमाडौं–चित्लाङ यात्रा प्रभावित हुने भएको छ ।  

सडक डिभिजन कार्यालय काठमाडौंले सडक स्तरोन्नति र पुनर्निर्माण कार्यलाई तीव्र बनाउन जेठ १७ देखि ३० गतेसम्म पानीघट्ट–चित्लाङ बजार खण्ड पूर्ण रूपमा बन्द गर्ने निर्णय गरेको हो ।

कार्यालयका अनुसार उक्त सडकखण्डमा अहिले सडक कटिङ, ढलान, निर्माण सामग्री ढुवानी तथा संरचना सुधारका काम भइरहेका छन् ।  

साँघुरा घुम्ती, जोखिमयुक्त भौगोलिक बनावट र निर्माणस्थलमै सवारी सञ्चालन भइरहँदा दुर्घटनाको जोखिम बढेको तथा निर्माण कार्य प्रभावित भएको जनाइएको छ ।

सडक डिभिजन कार्यालयले निर्माणको गुणस्तर र समयसीमा दुवै जोगाउन केही समयका लागि पूर्ण रूपमा सवारी आवागमन रोक्नुपरेको स्पष्ट पारेको छ ।  

कार्यालयका अनुसार काम भइरहेकै स्थानबाट सवारी सञ्चालन गर्दा यात्रु सुरक्षामा समेत जोखिम बढेको थियो ।

सडक बन्द भएसँगै चित्लाङ हुँदै हेटौँडा आवतजावत गर्ने सवारी, पर्यटक तथा स्थानीय बासिन्दा प्रभावित हुने भएका छन् ।

पछिल्लो समय चित्लाङ आन्तरिक पर्यटनको लोकप्रिय गन्तव्य बन्दै गएकाले होटल व्यवसाय र स्थानीय व्यापारमा समेत असर पर्ने अनुमान गरिएको छ ।

चन्द्रागिरी नगरपालिका र थाहा नगरपालिका सँग समन्वय गरेर वैकल्पिक मार्गबारे सूचना प्रवाह तथा यात्रु सहजीकरणको तयारी गरिएको जनाइएको छ ।

यात्रु तथा सवारी चालकलाई वैकल्पिक सडक प्रयोग गर्न प्रशासनले आग्रह गरेको छ ।