आधा दर्जन कम्पनीले मागे आईपीओ निष्कासनको अनुमति, कुनले कति ?

काठमाण्डौ । विभिन्न सेक्टरका ६ कम्पनीले आईपीओ निष्कासनको अनुमति मागेका छन् । नेपाल धितोपत्र बोर्ड (सेबोन)को पाइपलाइनमा दुई हाइड्रो सेक्टरका कम्पनी र चार उत्पादन तथा प्रशोधन सेक्टरका गरी कुल ६ वटा कम्पनी थपिएका छन् ।  

हाइड्रोपावर समूहतर्फ सुपरहेवा पावर कम्पनी र रघुगंगा हाइड्रोपावर तथा उत्पादन र प्रशोधन समूहतर्फतर्फ राजेश मेटल क्राफ्ट्स लिमिटेड, अन्नपूर्ण माछा दाना उद्योग लिमिटेड, युवरानी एग्रो इन्डस्ट्रिज लिमिटेड र प्रिमियर डिस्टिलरी लिमिटेड रहेका छन् ।

हाइड्रोपावर समूहका सुपर हेवा पावर कम्पनी लिमिटेडले अंकित मूल्य १०० रुपैयाँ दरको १९ करोड २५ लाख रुपैयाँ बराबरको १९ लाख २५ हजार कित्ता सेयर निष्कासन गर्न अनुमति मागेको छ । कम्पनीले जेठ ७ गते बोर्डमा निवेदन दिएको हो । बिक्री प्रबन्धकमा लक्ष्मी सनराइज क्यापिटल लिमिटेड रहेको छ ।  

त्यस्तै, रघुगंगा हाइड्रोपावर लिमिटेडले अंकित मूल्य १०० रुपैयाँ दरकै १ अर्ब ५० करोड रुपैयाँ बराबरको १ करोड ५० लाख कित्ता सेयर निष्कासन गर्न बोर्डसँग अनुमति मागेको हो । कम्पनीले बिक्री प्रबन्धकमा एनआईसी एसिया क्यापिटललाई बिक्री प्रबन्धक तोक्दै जेठ ८ गते आवेदन दिएको हो  ।

उत्पादन तथा प्रशोधन समूहतर्फका कम्पनीहरुमा राजेश मेटल क्राफ्ट्स लिमिटेडले ६० करोड रुपैयाँ बराबरको ६० लाख कित्ता सेयर निष्कासन गर्न जेठ ७ गते बोर्डमा आवेदन दिएको छ । कम्पनीकोे बिक्री प्रबन्धकमा नबिल इन्भेस्टमेन्ट बैंकिङ लिमिटेड रहेको छ ।  

साथै जेठ ७ गते नै अन्नपूर्ण माछा दाना उद्योग लिमिटेडले पनि १० करोड ९ लाख ५३ हजार १०० रुपैयाँ बराबरको १० लाख ९ हजार ५३१ कित्ता सेयरका लागि बोर्डमा निवेदन दिएको छ । कम्पनीको बिक्री प्रबन्धक लक्ष्मी सनराइज क्यापिटल लिमिटेड रहेको छ ।  

यता एग्रो क्षेत्रको युवरानी एग्रो इन्डस्ट्रिज लिमिटेडले १६ करोड ५० लाख रुपैयाँ बराबरको १६ लाख ५० हजार कित्ता सेयर निष्कासन गर्न बोर्डसँग अनुमति मागेको छ । कम्पनीले प्रभु क्यापिटल लिमिटेडलाई बिक्री प्रबन्धक तोक्दै जेठ ७ गते नै बोर्डमा निवेदन दिएको हो ।  

यसका साथै प्रिमियर डिस्टिलरी लिमिटेडले अंकित मूल्य १०० रुपैयाँ दरमै २२ करोड ५० लाख रुपैयाँ बराबरको २२ लाख ५० हजार कित्ता आईपीओ निष्कासनका लागि बोर्डसँग अनुमति मागेको छ । कम्पनीले जेठ ८ गते बोर्डमा निवेदन दिएको हो । बिक्री प्रबन्धकमा सिद्धार्थ क्यापिटल लिमिटेड रहेको छ ।  

यी ६ वटैै कम्पनीहरू हाल धितोपत्र बोर्डको पाइपलाइनमा छन् । उक्त कम्पनीहरूले कुल २ अर्ब ७८ करोड ३४ लाख ५३ हजार १ सय रुपैयाँ बराबरको कुल २ करोड ७८ लाख ३४ हजार ५ सय ३१ कित्ता सेयर निष्कासनका लागि प्रक्रिया अगाडि बढाएका हुन् ।