सेबोनको नेतृत्व संकटले थन्किए नयाँ आईपीओ, १०४ कम्पनी अनुमतिको पर्खाइमा

काठमाण्डौ । नेपाल धितोपत्र बोर्ड (सेबोन) अध्यक्षबिहिन हुँदा दुई महिनादेखि यता नयाँ कम्पनीले आईपीओ निष्कासनको अनुमति पाउन सकेका छैनन् ।  

सेबोनले अन्तिम पटक गत वैशाख २ गते माउन्ट एभरेष्ट पावर, सर्वोत्तम पेन्ट्स र एभरेष्ट कलर लिमिटेडलाई आईपीओ बिक्री गर्न अनुमति दिएको थियो । त्यसयता कुनै पनि कम्पनीले अनुमति पाउन सकेका छैनन् ।  

गत वैशाख ४ गतेदेखि सबोन अध्यक्षबिहिन छ । तत्कालीन अध्यक्ष सन्तोषनारायण श्रेष्ठले पदबाट राजीनामा दिएपछि सेबोनको अध्यक्ष पद रित्तो भएको हो । त्यसपछि अर्थमन्त्रालयले नयाँ अध्यक्ष नियुक्तिका लागि प्रक्रिया अघि बढाउदै वैशाखमै आवेदनसमेत खुलाएको थियो ।  

सेबोन अध्यक्ष छनौट सिफारिस समितिले अध्यक्ष पदका लागि गत जेठ ५ गते ३ जनाको नाम सर्टलिस्ट समेत गरेको छ, तर एक महिना बितिसक्दा पनि सरकारले बोर्डको अध्यक्ष नियुक्ति गर्न सकेको छैन ।  

पूँजीबजारको नियामक निकाय सम्हाल्ने मुख्य अधिकारी चयन हुन नसक्दा प्राथमिक बजारसँगै धितोपत्र दोस्रो बजारको अवस्था अवनत हुन पुगेको छ ।  

बोर्डनै अध्यक्षबिहिन भएपछि यता आईपीओ निष्कासनको लागि अनुमति माग्ने कम्पनीको चाङ चुलिदै गएको छ । बोर्डका उच्च कर्मचारीहरुका अनुसार अध्यक्ष नै नभएपछि आईपीओ अनुमतिको काम रोकिन पुगेको हो । अहिले कर्मचारीहरुले पाइपलाइनमा रहेका कम्पनीको विवरण हेर्ने र सम्बन्धित कम्पनीलाई अपुग डकुमेन्ट पुनः पेश गर्न लगाउने जस्ता काम भइरहेको कर्मचारीहरु बताउँछन् ।  

अब सरकारले धितोपत्र बोर्ड अध्यक्ष नियुक्ति गरेपछि मात्रै थप नयाँ कम्पनीहरुले आईपीओ निष्कासनको अनुमति पाउनेछन् । बोर्ड अध्यक्ष चयन गर्न सरकारले नै ढिलाई गरिरहेको छ । ३ जनाको नाम सिफारिस गरेपछि मात्रै पनि तीनपटक मन्त्रिपरिषदको बैठक बसिसकेको छ । तर बोर्ड अध्यक्ष नियुक्तिको विषयमा कुनै पनि निर्णय हुन सकेको छैन ।  

यता सरकारले भने आवश्यक प्रक्रिया पुरा गरेर मात्रै बोर्ड अध्यक्ष नियुक्त गर्ने जनाएको छ । सरकारका प्रवक्ता सस्मित पोखरेलले पदपूर्तिका लागि नाम सर्टलिस्ट गरेपनि आवश्यक प्रक्रिया पुरा गरेर मात्रै अध्यक्ष चयन गर्ने बताएका छन् ।  

रु.६९.३० अर्ब बराबरको आईपीओ पाइपलाइनमा  

नेपाल धितोपत्र बोर्डको पाइपलाइनमा विभिन्न समूहका १०४ कम्पनी आईपीओ निष्कासनको अनुमति कुर्दै छन् ।  

उक्त कम्पनीहरुले ६९ अर्ब ३० करोड ७७ लाख ४५ हजार रुपैयाँ बराबरको कु ल ४७ करोड २८ लाख ९४ हजार कित्ता सेयर निष्कासनको अनुमति मागेका हुन् ।  

जसमा होटल तथा पर्यटन समूहका १८ कम्पनीले ६ अर्ब ४५ करोड १३ लाख रुपैयाँ बराबरको ५ करोड ८२ लाख १३ हजार कित्ता, हाइड्रो समूहका ३४ कम्पनीले १७ अर्ब ५० करोड ३१ लाख रुपैयाँ बराबरको १७ करोड १४ लाख ८३ हजार कित्ता, लगानी समूहका ५ कम्पनीले ३ अर्ब ४१ करोड ६० लाख रुपैयाँ बराबरको २ करोड १४ लाख कित्ता र उत्पादन तथा प्रशोधन समूहका ३० कम्पनीले ३५ अर्ब ३५ करोड २२ लाख ८८ हजार रुपैयाँ बराबरको १६  करोड ६४ लाख २५ हजार कित्ता सेयर निष्कासनका गर्न अनुमति मागेका छन् ।  

त्यस्तै, माइक्रो इन्स्योरेन्स समूहका ३ कम्पनीले ६७ करोड ५० लाख रुपैयाँ बराबरको ६७ लाख ५० हजार कित्ता र अन्य समूहका १४ कम्पनीले ५ अर्ब ९० करोड ९९ लाख रुपैयाँ बराबरको ४ करोड ८६ लाख २१ हजार कित्ता सेयर निष्कासन गर्न बोर्डसँग अनुमति मागेका छन् ।