मन्त्रालयमा एक सचिवको व्यवस्था, ६ पद कटौती हुने

काठमाण्डौ । सरकारले मन्त्रालयहरूको प्रशासनिक संरचना थप चुस्त बनाउन प्रत्येक मन्त्रालयमा एक जना मात्रै सचिव रहने व्यवस्था लागू गरेको छ।  

हालै गरिएको सचिव सरुवासँगै यो व्यवस्था कार्यान्वयनमा आएको हो भने संगठन तथा व्यवस्थापन सर्वेक्षण (ओएन्डएम) पछि यसले स्थायी रूप लिनेछ।

सरकारले मन्त्रालयको संख्या २२ बाट घटाएर १८ मा झारेपछि प्रशासनिक पुनर्संरचना अघि बढाएको हो।  

सोही क्रममा यसअघि दुई–दुई सचिव रहेका केही मन्त्रालयमा अब एक जना मात्र सचिव रहनेछन्।

नयाँ व्यवस्थाबाट सचिवका ६ वटा दरबन्दी घट्नेछन्। हाल ७१ रहेको सचिव पद संख्या घटेर ६५ मा पुग्नेछ। 

अतिरिक्त भएका केही सचिवलाई प्रधानमन्त्री तथा मन्त्रिपरिषद् कार्यालयको जगेडा समूहमा राखिएको छ।

सरकारले अवकाश नजिक रहेका सचिवहरू सेवा निवृत्त भएपछि मात्रै रिक्त पद व्यवस्थापन गर्ने र तत्काल नयाँ बढुवा नगर्ने तयारी पनि गरेको छ।

मुख्यसचिव सुमनराज अर्यालका अनुसार मन्त्रिपरिषद्को निर्णयअनुसार मन्त्रालयहरूमा एक सचिवको संरचना कायम गरिनेछ, जसलाई ओएन्डएममार्फत दीर्घकालीन रूपमा कार्यान्वयन गरिनेछ।