वन कर्मचारीद्वारा टेम्पो भीरबाट खसालिएको घट्नाको अनुसन्धान शुरु

काठमाण्डौ । कैलालीको गोदावरी नगरपालिका–४ बासपानी क्षेत्रमा सडक किनारमा व्यापार गरेको आरोपमा डिभिजन वन कार्यालयका कर्मचारीले एक स्थानीय महिलाको टेम्पो धकेल्दै भीरबाट खसालेको आरोप लागेपछि घटना विवादमा परेको छ।  

घटनाको भिडियो सामाजिक सञ्जालमा सार्वजनिक भएसँगै व्यापक आलोचना भइरहेको छ।

 

शुक्रबार दिउँसो भीमदत्त राजमार्गअन्तर्गत गोदावरी सामुदायिक वन क्षेत्र नजिक भएको घटनामा वन कर्मचारीहरूले टेम्पोलाई धकेल्दै भीरबाट खसालेको दृश्य देखिएको दाबी गरिएको छ।

पीडित ४४ वर्षीया धनादेवी धामीले टेम्पोमा पानी, चाउचाउ, बिस्कुट, अण्डा लगायतका सामान राखेर सडक किनारमा व्यापार गर्दै आएको बताउँदै आफूले जीविकोपार्जनका लागि सानो व्यवसाय गरिरहेको जनाएकी छन्।  

उनले वन कर्मचारीले सामान निकालेपछि टेम्पो नै भीरबाट खसालिदिएको आरोप लगाउँदै न्यायको माग गरेकी छन्।

यता डिभिजन वन कार्यालय कैलालीले भने टेम्पो जानाजानी नखसालिएको दाबी गरेको छ।

कार्यालयका अनुसार अतिक्रमण हटाउने क्रममा टेम्पो गुड्न नसक्ने अवस्थामा थियो र भौगोलिक असन्तुलन तथा नियन्त्रण प्रक्रियाका कारण दुर्घटनावश भीरमा खसेको हो।

प्रहरीका अनुसार घटनाबारे दुवै पक्षका फरक–फरक दाबी प्राप्त भएका छन् र थप अनुसन्धान भइरहेको छ।  

कैलालीका प्रहरी प्रमुख एसपी नरेन्द्र चन्दले तथ्य संकलनपछि मात्र निष्कर्षमा पुगिने बताएका छन्।

घटनापछि वन क्षेत्र व्यवस्थापन, सरकारी निकायको बल प्रयोग र स्थानीय जीविकोपार्जनबीचको सन्तुलनबारे गम्भीर प्रश्न उठेको छ।