आइभोरी कोस्टको विजयी शुरुवात, इक्वेडरको १९ खेलको अपराजित यात्रा अन्त्य

काठमाण्डौ ।  फिफा विश्वकप २०२६ अन्तर्गत आफ्नो पहिलो खेलमै आइभोरी कोस्टले प्रभावशाली प्रदर्शन गर्दै दक्षिण अमेरिकी टोली इक्वेडरलाई १–० ले पराजित गरेको छ।  

अमेरिकाको फिलाडेल्फियामा सम्पन्न खेलमा अन्तिम समयमा गरिएको गोल नै अफ्रिकी टोलीका लागि निर्णायक बन्यो।

यो नतिजासँगै आइभोरी कोस्टले विश्वकपमा विजयी पुनरागमन मात्र गरेन, इक्वेडरको १९ खेल लामो अपराजित यात्रालाई पनि अन्त्य गरिदियो।  

लगातार उत्कृष्ट लयमा रहेको इक्वेडर २०औँ खेलमा आएर हार बेहोर्न बाध्य बन्यो।

१२ वर्षपछि विश्वकपको मञ्चमा फर्किएको आइभोरी कोस्टले खेलभर संयमित र संगठित प्रदर्शन गरेको थियो।  

निर्धारित समयको अन्त्यतिर आएको गोलले टोलीलाई महत्वपूर्ण तीन अंक दिलायो। 

गोलपछि खेलाडीहरूले उत्साहपूर्ण खुसी मनाउँदा इन्जुरी समयसमेत केही लम्बिएको थियो।

अग्रता लिएपछि रक्षात्मक रणनीतिमा सीमित नभई आइभोरी कोस्टले थप आक्रमणको प्रयास जारी राख्यो।  

खेलको अन्तिम क्षणमा इक्वेडरको कर्नर अवसर विफल पार्दै आमद डियालो र यान डियोमान्डेले तीव्र गतिमा काउन्टर अट्याक शुरु गरेका थिए।

उक्त अवसर गोलमा परिणत नभएपनि टोलीको आत्मविश्वास र आक्रामक मानसिकता स्पष्ट देखिएको थियो।

विश्वकपको सुरुआती खेलमै सशक्त सन्देश दिएको आइभोरी कोस्टले समूह चरणको प्रतिस्पर्धालाई थप रोचक बनाएको छ भने इक्वेडरले पहिलो हारपछि पुनरागमनका लागि आगामी खेलमा दबाब सामना गर्नुपर्ने भएको छ।