४ घण्टामा दुई हजारभन्दा बढी चालक ट्राफिक कारबाहीमा, १० लाख बढी राजस्व सङ्कलन

काठमाण्डौ । काठमाडौँ उपत्यकामा ट्राफिक नियम उल्लङ्घन गर्ने दुई हजारभन्दा बढी सवारी चालकलाई पछिल्लो २४ घण्टामा कारबाही गरिएको छ।  

कारबाहीमा परेका चालकबाट रु १० लाख ४८ हजार पाँच सय राजस्व सङ्कलन भएको काठमाडौँ उपत्यका ट्राफिक प्रहरी कार्यालयले जनाएको छ।

कार्यालयका प्रवक्ता प्रहरी उपरीक्षक नरेशराज सुवेदीका अनुसार मादक पदार्थ सेवन गरी सवारी चलाउने १०० जना, नियमविपरीत राइड सेयरिङ गर्ने १०७ जना, ट्राफिक बत्तीको उल्लङ्घन गर्ने १३६ जना तथा तीव्र गतिमा सवारी चलाउने १६५ जनामाथि कारबाही गरिएको हो।

त्यसैगरी लेन अनुशासन पालना नगर्ने ५८, निषेधित क्षेत्रमा हर्न बजाउने १०९, सडक पेटीमा पार्किङ गर्ने १०५, एकतर्फी सडकमा सवारी चलाउने ११७ तथा अन्य विभिन्न ट्राफिक नियम उल्लङ्घन गर्ने एक हजार १२८ जनालाई समेत कारबाही गरिएको प्रहरीले जनाएको छ।

ट्राफिक प्रहरीका अनुसार सडक अनुशासन कायम गर्न नियमित अनुगमन र चेकजाँचलाई थप प्रभावकारी बनाइएको छ।