पाथीभरामा जेठ महिनामा ४६ लाखभन्दा बढी भेटी संकलन

काठमाण्डौ । ताप्लेजुङस्थित प्रसिद्ध धार्मिक तथा पर्यटकीय स्थल पाथीभरामा जेठ महिनामा ४६ लाख रुपैयाँभन्दा बढी भेटी संकलन भएको छ।

पाथीभरा क्षेत्र विकास समितिका अनुसार जेठ महिनाभरमा कुल ४६ लाख ६० हजार ६०० रुपैयाँ भेटी रकम संकलन भएको हो। 

समितिका कार्यकारी निर्देशक प्रजिन हाङ्बाङले सार्वजनिक गरेको विवरणअनुसार मन्दिरमा आएका भक्तजनले चढाएको दान तथा भेटीबाट उक्त रकम संकलन गरिएको हो।

संकलित भेटी रकम मंगलबार सार्वजनिक गर्दै समितिले सो रकम नेपाल बैंक लिमिटेडमा रहेको आफ्नो खातामा जम्मा गरिएको जनाएको छ।  

पाथीभरा क्षेत्र विकास समितिले मन्दिरमा संकलन हुने भेटी रकम प्रत्येक महिना सार्वजनिक गर्दै आएको छ।

यसअघि वैशाख महिनामा पाथीभरामा १ करोड ६ लाख २८ हजार रुपैयाँ भेटी संकलन भएको थियो।  

त्यसको तुलनामा जेठ महिनामा भेटी रकममा गिरावट आएको देखिएको छ।

समितिका अनुसार जेठ महिनामा कुल ८ हजार ३८७ जना भक्तजनले पाथीभरा मन्दिरको दर्शन गरेका छन्।  

दर्शनका लागि देशका विभिन्न जिल्लासँगै भारतको सिक्किम, दार्जिलिङ, पश्चिम बंगाल लगायतका क्षेत्रबाट समेत श्रद्धालुहरू आउने गरेका छन्।

पाथीभरा मन्दिरबाट संकलित भेटी रकम मन्दिरको व्यवस्थापन, पूर्वाधार विकास तथा धार्मिक क्षेत्रको संरक्षण र सुधारका कार्यमा प्रयोग गरिँदै आएको समितिले जनाएको छ।