शाओमीको चालकविहीन विद्युतीय एसयूभीले रच्यो इतिहास

काठमाण्डौ । चिनियाँ प्रविधि कम्पनी शाओमीले अटोमोबाइल क्षेत्रमा अर्को महत्वपूर्ण उपलब्धि हासिल गरेको छ। कम्पनीको उच्च–प्रदर्शन विद्युतीय एसयूभी शाओमी वाईयू७ जीटी ले जर्मनीस्थित विश्वप्रसिद्ध नुर्बुर्गरिङ नोर्डश्लाइफे रेस ट्र्याकमा चालकविहीन रूपमा पूरा ल्याप सम्पन्न गर्दै नयाँ कीर्तिमान बनाएको छ।

करिब २०.८ किलोमिटर लामो तथा विश्वकै चुनौतीपूर्ण र खतरनाक रेस ट्र्याकमध्ये एक मानिने नुर्बुर्गरिङ नोर्डश्लाइफेमा वाईयू७ जीटीले कुनै पनि मानवीय हस्तक्षेपबिना १० मिनेट २९.४८३ सेकेन्डमा पूरा चक्कर लगाएको हो। यो नुर्बुर्गरिङमा आधिकारिक रूपमा समय मापन गरिएको पहिलो चालकविहीन ल्याप भएको शाओमीको दाबी छ।

परीक्षणका क्रममा गाडीले कहाँ गति बढाउने, कहाँ ब्रेक लगाउने र कुन मोडमा कसरी प्रवेश गर्ने भन्ने सबै निर्णय स्वचालित प्रणालीमार्फत आफैं गरेको थियो। शाओमीको स्वदेशी स्वायत्त ड्राइभिङ प्रणालीले वातावरणको पहिचान, निर्णय प्रक्रिया, नियन्त्रण तथा चेसिस समन्वयको क्षमता प्रदर्शन गरेको कम्पनीले जनाएको छ।

चालकविहीन परीक्षणमा सावधानीपूर्वक सञ्चालन गरिएको यो गाडीले व्यावसायिक चालकसहित भने निकै तीव्र प्रदर्शन गरेको छ। शाओमीका अनुसार वाईयू७ जीटीले नुर्बुर्गरिङ ट्र्याकमा ७ मिनेट २२.७५५ सेकेन्डको ल्याप समय निकाल्दै एसयूभी वर्गको नयाँ रेकर्ड कायम गरेको थियो।

१,००० हार्सपावरभन्दा बढी शक्ति

वाईयू७ जीटीमा करिब १ हजार ३ हार्सपावर क्षमता रहेको छ। यो विद्युतीय एसयूभीले ० देखि १०० किलोमिटर प्रतिघण्टाको गति केवल २.९२ सेकेन्डमा हासिल गर्न सक्छ भने यसको अधिकतम गति ३०० किलोमिटर प्रतिघण्टासम्म पुग्ने बताइएको छ।

यद्यपि केही प्रश्न अझै अनुत्तरित छन्। गाडीले ट्र्याकको पूर्वनिर्मित डिजिटल नक्सा प्रयोग गरेको थियो वा वास्तविक समयमा आफैं निर्णय गर्दै चलेको थियो भन्नेबारे कम्पनीले विस्तृत जानकारी सार्वजनिक गरेको छैन। त्यस्तै, परीक्षणका क्रममा कुनै प्रकारको दूरस्थ निगरानी वा सुरक्षा नियन्त्रण प्रयोग गरिएको थियो कि थिएन भन्ने विषयमा पनि स्पष्टता आएको छैन।