कोशीदेखि बागमतीसम्म मनसुनको प्रभाव, कतै वर्षा, कतै तातो लहरको सम्भावना

काठमाण्डौ । जल तथा मौसम पूर्वानुमान महाशाखाले देशका विभिन्न भागमा मनसुनी प्रणाली सक्रिय रहेको जनाएको छ।  

महाशाखाका अनुसार कोशी, मधेश र बागमती प्रदेशका अधिकांश भू-भाग, गण्डकी प्रदेशका केही क्षेत्र तथा लुम्बिनी प्रदेशको पूर्वी तराईका केही स्थानमा मनसुनी वायुको प्रभाव देखिएको छ।

महाशाखाले अन्य प्रदेशहरूमा पश्चिमी र स्थानीय वायुको आंशिक प्रभाव रहेको बताएको छ।  

हाल कोशी प्रदेशमा सामान्यतया बादल लागेको अवस्था छ भने मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा आंशिक बदली रहेको छ।

कोशी प्रदेशका केही स्थान तथा बागमती प्रदेशका एक/दुई स्थानमा हल्कादेखि मध्यम वर्षा भइरहेको महाशाखाले जनाएको छ।

दिउँसोको पूर्वानुमानअनुसार देशभरका हिमाली र पहाडी भूभाग तथा कोशी प्रदेशको तराई क्षेत्रमा सामान्य बदली रहनेछ।  

मधेश प्रदेशमा आंशिक बदलीको अवस्था रहने अनुमान छ।  

बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा भने मौसम मुख्यतया सफा रहने सम्भावना छ।

महाशाखाका अनुसार कोशी, बागमती र गण्डकी प्रदेशका हिमाली तथा पहाडी क्षेत्रमा केही स्थानमा तथा लुम्बिनी, कर्णाली र सुदूरपश्चिम प्रदेशका उच्च पहाडी भूभागका एक/दुई स्थानमा मेघगर्जन र चट्याङसहित मध्यम वर्षा वा हिमपातको सम्भावना रहेको छ। 

त्यस्तै, कोशी प्रदेशको तराई क्षेत्रका केही स्थान र मधेस प्रदेशका एक/दुई स्थानमा पनि मेघगर्जनसहित मध्यम वर्षा हुने सम्भावना छ।

त्यसैगरी, लुम्बिनी र सुदूरपश्चिम प्रदेशका तराई क्षेत्रमा केही स्थानमा तातो लहर चल्न सक्ने तथा बागमती र गण्डकी प्रदेशका तराई क्षेत्रमा तापक्रम बढ्ने सम्भावना रहेको महाशाखाले जनाएको छ।

रातिको मौसम पूर्वानुमानअनुसार कोशी, बागमती र गण्डकी प्रदेशका हिमाली तथा पहाडी क्षेत्र तथा कोशी प्रदेशको तराई क्षेत्रमा सामान्य बदली रहनेछ।  

मधेश प्रदेश तथा लुम्बिनी, कर्णाली र सुदूरपश्चिम प्रदेशका पहाडी र हिमाली क्षेत्रमा आंशिक बदली रहने अनुमान छ।  

तर, बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा मौसम मुख्यतया सफा रहनेछ।

राति कोशी र गण्डकी प्रदेशका केही हिमाली तथा पहाडी क्षेत्रमा तथा बागमती प्रदेशका एक/दुई स्थानमा मेघगर्जनसहित मध्यम वर्षा वा हिमपातको सम्भावना रहेको छ।  

साथै, कोशी प्रदेशको तराई क्षेत्रका केही स्थान तथा मधेश प्रदेशका एक/दुई स्थानमा पनि मेघगर्जनसहित वर्षा हुन सक्ने महाशाखाले जनाएको छ।

महाशाखाले चट्याङ, तातो लहर तथा तापक्रम वृद्धिको सम्भावना रहेका क्षेत्रमा आवश्यक सतर्कता अपनाउन सर्वसाधारणलाई आग्रह गरेको छ।  

साथै मौसमसम्बन्धी अद्यावधिक जानकारी नियमित रूपमा लिन पनि अनुरोध गरिएको छ।