गणेश नेपालीको मृत्युपछि माइतीघरमा युवा आक्रोश, सरकार र बालेनविरुद्ध नाराबाजी

काठमाण्डौ । राइड सेयरिङ चालक गणेश नेपालीको उपचारका क्रममा मृत्यु भएपछि युवाहरूले काठमाडौंको माइतीघर मण्डलामा विरोध प्रदर्शन गरेका छन्।

‘बालेन, तिम्रो झिकैझिकै माया गणेशको आत्मदाह थियो’ लेखिएको प्लेकार्डसहित प्रदर्शनमा उत्रिएका युवाहरूले घटनाको निष्पक्ष छानबिन गरी दोषीमाथि कारबाही गर्न माग गरेका हुन्।

प्रदर्शनकारीहरूले गणेशको मृत्युका लागि राज्यका जिम्मेवार निकाय उत्तरदायी रहेको आरोप लगाउँदै सरकार र काठमाडौं महानगरपालिकाविरुद्ध नाराबाजी गरेका थिए।

प्रदर्शनका क्रममा ‘राज्य आतंक मुर्दावाद’, ‘बालेन, के तिम्रो राज्यमा गरिब र युवा अट्न नसक्ने हो?’ र ‘हत्यारा सरकार मुर्दावाद’ लगायतका नारा लेखिएका प्लेकार्ड प्रदर्शन गरिएको थियो।

त्रिपुरेश्वरस्थित राहदानी विभाग अगाडि बिहीबार गम्भीर अवस्थामा फेला परेका २५ वर्षीय गणेश नेपालीको उपचारका क्रममा शुक्रबार बिहान निधन भएको थियो।

घटनापछि परिवार तथा प्रदर्शनकारीहरूले उनले भोगेको भनिएको दुर्व्यवहार र मानसिक दबाबबारे सत्यतथ्य सार्वजनिक गर्न तथा घटनासँग सम्बन्धित व्यक्तिमाथि कानुनी कारबाही गर्न माग गरेका छन्।