सुनचाँदी व्यवसाय अब डिजिटल प्लेटफर्ममा, महासंघले ल्यायो वेबसाइट र एप

काठमाण्डौ । नेपाल सुनचाँदी, रत्न तथा आभूषण महासंघले सुनचाँदी व्यवसायलाई डिजिटल र प्रविधिमैत्री बनाउने उद्देश्यसहित आफ्नो आधिकारिक वेबसाइट र मोबाइल एप सार्वजनिक गरेको छ।

मंगलबार त्रिपुरेश्वरस्थित महासंघको सचिवालयमा आयोजित कार्यक्रममा नेपाल चेम्बर अफ कमर्सका अध्यक्ष कम्लेश कुमार अग्रवालले वेबसाइट र मोबाइल एपको औपचारिक शुभारम्भ गरेका हुन् ।

वेबसाइट र मोबाइल एपमार्फत सदस्यहरूले सुनचाँदीको दैनिक बजार मूल्य, महासंघका सूचना तथा परिपत्र, ऐन–नियम, कार्यक्रमका विवरणलगायत आवश्यक जानकारी सहजै प्राप्त गर्न सक्नेछन्। महासंघले यस डिजिटल प्रणालीले व्यवसायलाई थप व्यवस्थित, सुरक्षित, पारदर्शी र प्रभावकारी बनाउन सहयोग पुग्ने विश्वास व्यक्त गरेको छ।

कार्यक्रममा देशभरका सदस्य संघका अध्यक्ष, पदाधिकारी तथा प्रतिनिधिहरूको भौतिक तथा भर्चुअल माध्यमबाट सहभागिता रहेको थियो। सहभागीहरूले डिजिटल प्लेटफर्मको प्रभावकारी कार्यान्वयन, सेवाको विस्तार र आगामी दिनमा थप सुविधा समावेश गर्न सुझाव दिएका थिए।