शाइन रेसुङ्गा डेभलपमेन्ट बैंक १.१८ अर्ब नाफा कमाउन सफल, ईपीएस र लाभांश क्षमता समेत बढ्यो

काठमाण्डौ । शाइन रेसुङ्गा डेभलपमेन्ट बैंक लिमिटेडले गत आवको चौथो त्रैमाससम्म १ अर्ब बढी नाफा कमाउन सफल भएको छ । बैंकले सार्वजनिक गरेको त्रैमासिक प्रतिवेदनअनुसार बैंकले उक्त अवधिसम्म १ अर्ब १८ करोड १२ लाख रुपैयाँबराबरको खुद नाफा आर्जन गरेको छ ।

जुन रकम अघिल्लो आवको सोही अवधिसम्म बैंकले आर्जन गरेको तुलनामा ८२.९६ प्रतिशतले बढी हो । अघिल्लो आवमा बैंकले ६४ करोड ५६ लाख रुपैयाँ नाफा कमाएको थियो ।

खुद ब्याज आम्दानी बढ्नु र इम्पे्यरमेन्ट चार्ज घट्नु जस्ता कारणले बैंकको नाफा वृद्धिमा सहयोग पुर्याएका हुन् । बैंकको खुद ब्याज आम्दानी ६.८९ प्रतिशत बढेको छ । बैंकले चौथो त्रैमाससम्म २ अर्ब ८२ करोड रुपैयाँबराबरको खुद ब्याज आम्दानी गरेको छ ।

अघिल्लो आवमा इम्पेयरमेन्ट चार्जका लागि ९५ करोड ४ लाख रुपैयाँ छुट्टाएको बैंकले समीक्षा अवधिसम्म भने २० करोड ७९ लाख रुपैयाँको व्यवस्था गरेको छ । बैंकको निष्कृय कर्जा भने ४.२७ प्रतिशतबाट बढेर ४.९३ प्रतिशत पुगेको छ ।

बैंकको वितरणयोग्य मुनाफा पनि बढेको छ । अघिल्लो आवमा ६६ करोड ५० लाख रुपैयाँ रहेको बैंकको वितरणयोग्य मुनाफा ८४ करोड ६४ लाख पुगेको छ । यस्तै लाभांश क्षमता पनि १३.७१ प्रतिशतबाट बढेर १६.८६ प्रतिशत पुगेको छ ।

बैंकको निक्षेप संकलन ७७ अर्ब ८५ करोड र कर्जा परिचालन ६३ अर्ब २६ करोड पुगेको छ ।

बैंकको चुक्तापूँजी ५ अर्ब २ करोड रुपैयाँ रहेकोमा रिटेन्ड अर्निङ २.६६ प्रतिशतले बढेर ८४ करोड ६४ लाख पुगेको छ । रिजर्भ फण्डको आकार पनि १६.३८ प्रतिशतले बढेर २ अर्ब १४ करोड पुगेको छ ।

बैंकको कस्ट अफ फण्ड ४.८५ प्रतिशतबाट घटेर ३.६८ प्रतिशत कायम भएको छ । बैंकको सिडि रेसियो ८४.१८ प्रतिशत, बेस रेट ५.३८ प्रतिशत, स्प्रेड दर ४.०१ प्रतिशत, आरओइ १५.३५ प्रतिशत, आरओए १.४१ प्रतिशत रहेको छ ।

समीक्षा अवधिसम्म बैंकको प्रतिसेयर आम्दानी २३.५२ रुपैयाँ, प्रतिसेयर नेटवर्थ १५९.४८, मूल्य आम्दानी अनुपात १७.६४ गुणा र तरलता अनुपात २७.३२ प्रतिशत कायम भएको छ ।