एक्सेल डेभलपमेन्ट बैंकको नाफामा २२,७८४.८०% को उछाल, अन्य सूचकमा पनि बलियो

काठमाण्डौ । खुद ब्याज आम्दानी बढेसँगै र इम्पेयरमेन्ट चार्ज रिर्भसल भएसँगै एक्सेल डेभलपमेन्ट बैंकको नाफामा राम्रो सुधार आएको छ । बैंकले गत आवको चौथो त्रैमाससम्म ३० करोड ९४ लाख रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिको तुलनामा २२७८४.८० प्रतिशतले बढी हो ।

अघिल्लो आवको चौथो त्रैमाससम्म भने कम्पनीको खुद नाफा १३ लाख ५१२ हजारमा सीमित थियो ।

यस्तै अघिल्लो आवमा ५६ करोड ५५ लाख रुपैयाँ खुद ब्याज आम्दानी गरेको बैंकले समीक्षा अवधिमा भने ६४ करोड ८८ लाख रुपैयाँ आर्जन गरेको छ । यस्तै बैंकको खुद शुल्क तथा कमिशन आम्दानी पनि ८ करोड २९ लाख रुपैयाँबाट बढेर ९ करोड ५५ लाख पुगेको छ ।

चौथो त्रैमासमा बैंकको वितरणयोग्य मुुनाफा १७ करोड ९७ लाख रुपैयाँ रहेको छ । जुन अघिल्लो आवमा भने १ करोड २६ लाख रुपैयाँले ऋणात्मक अवस्थामा थियो । अघिल्लो आवमा १.०१ प्रतिशतले ऋणात्मक रहेको बैंकको लाभांश क्षमता समेत १४.३८ रुपैयाँले धनात्मक बनेको छ ।

यस अवधिमा बैंकको इम्पेयरमन्ट चार्ज १९ करोड ४२ लाख रुपैयाँले रिभर्सल भएको छ । अर्को उपलब्धिको रुपमा बैंकले आफ्नो निष्कृय कर्जा समेत घटाएको छ । बैंकको निष्कृय कर्जा ६.६९ प्रतिशतबाट घटेर ४.५७ प्रतिशतमा सीमित बनेको छ ।

कस्ट अफ फण्ड पनि ३.८७ प्रतिशतबाट घटेर २.८९ प्रतिशतमा झरेको छ ।

१ अर्ब २४ करोड रुपैयाँबराबरको चुक्तापूँजी भएको बैंकको रिजर्भमा ७८ करोड ४१ लाख र रिटेन्ड अर्निङमा १७ करोड ९७ लाख रहेको छ ।

समीक्षा अवधिसम्म बैंकको प्रतिसेयर आम्दानी समेत ०.११ रुपैयाँबाट बढेर २४.७६ रुपैयाँ पुगेको छ । यस्तै बैंकको प्रतिसेयर नेटवर्थ १७७.८५ रुपैयाा, प्रतिसेयर कुल सम्पत्तिको मूल्य १७०६.७८ रुपैयाँ, पीई रेसियो २२.६७ गुणा र तरलता अनुपात ३४.८४ प्रतिशत कायम भएको छ ।