ह्युण्डाईका दुई नयाँ मोडल नेपालमा सार्वजनिक, आयोनिक ९ को मूल्य रु.२.१९ करोड

काठमाण्डौ । ह्युण्डाईले नेपाली बजारमा एकैपटक दुई नयाँ मोडल सार्वजनिक गरेको छ । कम्पनीले आजबाट सुरु भएको ‘नाइमा मोबिलिटी एक्स्पो २०२६’ मा प्रिमियम विद्युतीय ‘एसयूभी आयोनिक ९’ र लोकप्रिय एसयूभी भेन्युको फेसलिफ्ट मोडल नेपालमा सार्वजनिक गरेको हो ।

नाइमा मोबिलिटी एक्स्पोमा हुन्डाईले यी दुई मोडल सार्वजनिक गरेको हो । आयोनिक ९ पूर्ण विद्युतीय प्रिमियम एसयूभी हो भने भेन्यु फेसलिफ्ट पेट्रोल सेग्मेन्टमा आउने अपडेटेड मोडल हो ।

कम्पनीले भेन्यु फेसलिफ्टलाई नेपालमा चारवटा भेरियन्टमा बिक्री गर्ने जनाएको छ । यसको बेस भेरियन्टको मूल्य ४८ लाख ९६ हजार रुपैयाँ र हाइ भेरियन्टको मूल्य ६७ लाख ९६ हजार रुपैयाँ तोकिएको छ ।

भेन्युमा ११९७ सीसी क्षमताको इन्जिन उपलब्ध छ भने एनलाइन भेरियन्टमा ९९८ सीसी टर्बो इन्जिन दिइएको छ। भेरियन्टअनुसार गाडीमा ३६० डिग्री क्यामरा, विभिन्न ड्राइभ तथा ट्र्याक्सन मोड, विन्डो सनसेड, फ्रन्ट पार्किङ सेन्सर र रिक्लाइनिङ रियर सिटलगायतका सुविधा उपलब्ध छन् ।

आयोनिक ९ को मूल्य २ करोड १९ लाख

हुन्डाईको नयाँ पुस्ताको ठूलो आकारको विद्युतीय एसयूभी आयोनिक ९ नेपाली बजारमा २ करोड १९ लाख ९६ हजार रुपैयाँ मूल्यमा सार्वजनिक गरिएको छ ।

तीन लाइन सिटसहित आउने आयोनिक ९ परिवार केन्द्रित प्रिमियम विद्युतीय एसयूभीका रूपमा प्रस्तुत गरिएको छ । ठूलो ब्याट्री, लामो रेन्ज, फराकिलो केबिन र अत्याधुनिक प्रविधिसहितको यो मोडललाई हुन्डाईको प्रिमियम इलेक्ट्रिक पोर्टफोलियोमा राखिएको छ ।

आयोनिक ९ नेपालमा सार्वजनिक भएसँगै हुन्डाईले प्रिमियम विद्युतीय एसयूभी सेग्मेन्टमा आफ्नो उपस्थिति थप विस्तार गरेको छ । यो मोडलले नेपाली बजारमा उपलब्ध अन्य प्रिमियम इलेक्ट्रिक एसयूभीसँग प्रतिस्पर्धा गर्ने अपेक्षा गरिएको छ ।