मुक्तिनाथ विकास बैंकको नाफा १.५१ अर्ब, खुद ब्याज आम्दानी र ईपीएस कति ?

BANKING
बुधबार, श्रावण २७,२०८३ 06:39:47

काठमाण्डौ । मुक्तिनाथ विकास बैंकको खुद नाफा १२.४४ प्रतिशतले वृद्धि भएको छ । बैंकले गत आवको चौथो त्रैमाससम्म १ अर्ब ५१ करोड रुपैयाँ खुद नाफा आर्जन गरेको छ । अघिल्लो आवको सोहि अवधिसम्म बैंकले १ अर्ब ३५ करोड रुपैयाँ खुद नाफा आर्जन गरेको थियो ।

समीक्षा अवधिसम्म बैंकले खुद ब्याज आम्दानी पनि ३.६३ प्रतिशतले बढाउन सफल भएको छ । बैंकले ४ अर्ब ७४ करोड रुपैयाँबराबरको खुद ब्याज आम्दानी गरेको छ । बैंकले यो अवधिसम्म ४ अर्ब ८२ करोड रुपैयाँ खुद सञ्चालन आम्दानी गरेको छ ।

बैंकको सञ्चालन मुनाफा २ अर्ब ४२ करोड र खुद शुल्क तथा कमिशन आम्दानी ५४ करोड ९८ लाख रहेको छ । बैंकको इम्पेयरमेन्ट चार्ज ७९ करोड ३५ लाख रुपैयाँबाट घटेर ५७ करोड २३ लाख रुपैयाँमा सीमित बनेको छ । बैंकको रिटेन्ड अर्निङ ५०.०९ प्रतिशतले घट्दै ६७ करोड ५७ लाख रुपैयाँमा सीमित बनेको छ ।

त्यस्तै बैंकको रिजर्भको आकार भने २५.२६ प्रतिशतले बढेर ४ अर्ब २७ करोड रुपैयाँ पुगेको छ ।

बैंकको खराब कर्जा अनुपातमा वृद्धि भएको छ । अघिल्लो आवको चौथो त्रैमाससम्म २.९७ प्रतिशत रहेको खराब कर्जा अनुपात बढेर ४.७७ प्रतिशत पुगेको छ । बैंकको निक्षेप संकलन १ खर्ब २३ अर्ब र कर्जा प्रवाह १ खर्ब ५० करोड रुपैयाँ रहेको छ ।

यस्तै बैंकको वितरणयोग्य मुनाफा ६७ करोड ५७ लाख र लाभांश क्षमता ८.४५ प्रतिशत कायम भएको छ ।

समीक्षा अवधिसम्म बैंकको प्रतिसेयर आम्दानी(ईपीएस) १८.९८ रुपैयाँ, प्रतिसेयर नेटवर्थ १६१.८२ रुपैयाँ,प्रतिसेयर कुल सम्पत्तिको मूल्य १ हजार ७६३.१९ रुपैयाँ,तरलता अनुपात २७.९५ प्रतिशत,मूल्य आम्दानी अनुपात १९.१३ गुणा र रिर्टन अन इक्विटी १२.२७ प्रतिशत कायम भएको छ ।