क्यानडामाथि लाग्ने ५०% अमेरिकी ट्यारिफ तीन दिनका लागि रोकियो

काठमाण्डौ । अमेरिकी राष्ट्रपति डोनाल्ड ट्रम्पले क्यानडाबाट आयात हुने वस्तुमा बुधबारदेखि लागू हुने भनिएको ५० प्रतिशत नयाँ शुल्क तीन दिनका लागि स्थगित गरेका छन्। अमेरिका र क्यानडाबीच व्यापार सम्झौतामा सहमति भएको दाबी गर्दै ट्रम्पले शुल्क कार्यान्वयन रोकिएको बताएका हुन्।

ट्रम्पले मंगलबार राति सामाजिक सञ्जाल ट्रुथ सोसलमा पोस्ट गर्दै दस्तावेज अन्तिम रूप दिन बाँकी रहे पनि अमेरिका र क्यानडाबीच सम्झौता भएको बताए। यद्यपि, क्यानडा सरकारले भने तत्काल उक्त दाबीको पुष्टि गरेको छैन।

ट्रम्पका अनुसार पूर्वराष्ट्रपति जो बाइडेनको कार्यकालमा सन् २०२१ मा रद्द गरिएको केस्टोन एक्सएल पाइपलाइन परियोजना पुनः अघि बढ्न सक्ने सम्भावना पनि छ। तर उनले यसबारे थप विवरण भने दिएका छैनन्।

ट्रम्पको घोषणा क्यानडाका प्रधानमन्त्री मार्क कार्नीसँग मंगलबार भएको वार्तापछि आएको हो। यसै साता दुवै नेताबीच भएको यो दोस्रो संवाद हो। पछिल्ला केही सातादेखि अमेरिका र क्यानडाबीच व्यापारसम्बन्धी विषयमा तीव्र वार्ता हुँदै आएको थियो।

वार्तामा क्यानडाबाट आयात हुने सवारीसाधनमा अमेरिकाले लगाएको विद्यमान २५ प्रतिशत शुल्क प्रमुख विवादका रूपमा रहेको जनाइएको छ। दुवै पक्षले उक्त शुल्कलाई १५ प्रतिशतमा झार्ने तथा सवारीसाधनमा प्रयोग भएको अमेरिकी सामग्रीको हिस्साका आधारमा थप कटौती गर्ने विकल्पबारे छलफल गरेका थिए।

नयाँ ५० प्रतिशत शुल्क लागू भएको भए करिब २० अर्ब अमेरिकी डलर बराबरका क्यानडेली आयात प्रभावित हुने थिए। यसले अमेरिकी–मेक्सिको–क्यानडा व्यापार सम्झौता अन्तर्गत प्राथमिकतापूर्ण व्यवहार पाउने क्यानडेली वस्तुहरूलाई समेत असर पार्ने थियो।

व्यापार विज्ञ तथा उद्योग प्रतिनिधिहरूले नयाँ शुल्कले काठ, मदिरा र दुग्धजन्य उत्पादनजस्ता क्षेत्र प्रभावित हुने, रोजगारी गुम्ने तथा व्यवसाय बन्द हुने जोखिम बढ्ने चेतावनी दिएका छन्।

क्यानडेली चेम्बर अफ कमर्सकी प्रमुख कार्यकारी अधिकृत क्यान्डेस लाङले नयाँ शुल्कका कारण अर्बौं डलर बराबरका वस्तु जोखिममा पर्ने बताउँदै लामो समयदेखि अनिश्चितताका कारण व्यवसायहरूले रोजगारी सिर्जना, लगानी र विस्तारमा सावधानी अपनाइरहेको उल्लेख गरेकी छन्।

क्यानडाका अमेरिकी व्यापारसम्बन्धी मन्त्री डोमिनिक लेब्लाङ र प्रमुख वार्ताकार जेनिस च्यारेटे गत सातादेखि वासिङ्टनमा वार्तामा छन्। सोमबार उनीहरूले अमेरिकी व्यापार प्रतिनिधि जेमिसन ग्रियर र वाणिज्य सचिव हावर्ड लटनिकसँग करिब दुई घण्टा छलफल गरेका थिए।

अमेरिकाले क्यानडाको जवाफी शुल्क, केही प्रान्तले अमेरिकी मदिराको बिक्रीमा लगाएको रोक तथा क्यानडाको दुग्ध आपूर्ति व्यवस्थापन प्रणालीलाई समेत आफ्नो असन्तुष्टिका विषयका रूपमा उठाउँदै आएको छ।