नेपालको बाढी विपत्तिप्रति केन्या सरकारद्वारा दुःख व्यक्त

काठमाडौं। केन्या सरकारले नेपालमा आएको विनाशकारी बाढीबाट भएको मानवीय तथा भौतिक क्षतिप्रति गहिरो दुःख व्यक्त गर्दै नेपाल सरकार र नेपाली जनताप्रति ऐक्यबद्धता जनाएको छ।

केन्याका विदेश तथा डायस्पोरा मामिलासम्बन्धी मन्त्रिपरिषद् सचिव डा. मुसालिया मुडाभादीले परराष्ट्रमन्त्री शिशिर खनाललाई सम्बोधन गर्दै बाढीमा ज्यान गुमाउनेहरूप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेका हुन्।

आफ्नो देशले पनि विनाशकारी बाढीको पीडा भोगेको स्मरण गर्दै उनले नेपालको कठिन अवस्था र यसले नागरिकमा पारेको प्रभावलाई केन्याले गम्भीरतापूर्वक महसुस गरेको उल्लेख गरेका छन्।

“विनाशकारी बाढीको पीडा केन्याले पनि भोगेको हुनाले हामी नेपाली जनतासँग ऐक्यबद्धता प्रकट गर्दछौँ। ज्यान गुमाउनेहरूप्रति शोक व्यक्त गर्नुका साथै आफ्नो जीवन पुनर्निर्माण गरिरहेकाहरूको दृढताको सम्मान गर्दछौँ,” सन्देशमा भनिएको छ।

केन्या सरकारले विपद्को यस कठिन घडीमा नेपाल सरकार र नेपाली जनतासँग आफ्नो ऐक्यबद्धता निरन्तर रहनेसमेत जनाएको छ।