हिमालयन बैंकद्वारा बाढीपीडितका लागि ३ करोड १ लाख सहयोग

काठमाडौं। हिमालयन बैंक लिमिटेडले रसुवाको भोटेकोशी बाढीबाट प्रभावित नागरिकको उद्धार, राहत तथा पुनःस्थापनाका लागि ३ करोड १ लाख रुपैयाँ सहयोग गर्ने भएको छ।

बैंकले संस्थागत सामाजिक उत्तरदायित्वअन्तर्गत उक्त रकम प्रधानमन्त्री दैवी प्रकोप सहायता कोषमा उपलब्ध गराउने निर्णय गरेको हो।

भदौ १० गते बिहान रसुवा हुँदै बग्ने भोटेकोशी नदीमा गेग्रानसहित आएको विनाशकारी बाढीले भोटेकोशी र त्रिशूली नदी किनारका बस्तीमा ठूलो मानवीय तथा भौतिक क्षति पुर्‍याएको थियो। सोही विपत्तिबाट प्रभावित नागरिक तथा समुदायलाई सहयोग पुर्‍याउने उद्देश्यले आर्थिक सहायता घोषणा गरिएको बैंकले जनाएको छ।

अकल्पनीय विपत्तिबाट भएको जनधनको क्षतिले बैंक परिवारलाई मर्माहत बनाएको उल्लेख गर्दै हिमालयन बैंकले प्रभावित सबैलाई धैर्य धारण गर्न तथा राहत र उद्धार अभियानमा जुट्न आग्रह गरेको छ।

विपद्को यस कठिन समयमा प्रभावित नागरिक र समुदायसँगै रहेको जनाउँदै बैंकले सम्भव भएसम्मका सहयोगलाई निरन्तरता दिने प्रतिबद्धतासमेत व्यक्त गरेको छ।